راولپنڈی۔ 29 اپریل (اے پی پی):کمشنر راولپنڈی انجینئر عامر خٹک نے ہولی فیملی ہسپتال کا دورہ کیا۔ دورے کے دوران انہوں نے ہسپتال کے مختلف شعبہ جات کا جائزہ لیا، عملے کی حاضری چیک کی اور مریضوں کے وارڈز کا معائنہ کیا۔ کمشنر راولپنڈی نے کہا کہ انتظامیہ عوام کو طبی سہولیات کی بلا تعطل فراہمی یقینی بنائے۔انہوں نے مریضوں سے ہسپتال میں ہونے والے علاج، سہولیات، صفائی اور عملے کے رویے سے متعلق سوالات کیے۔ کمشنر نے مریضوں کی شکایات اور تجاویز سنیں اور فوری طور پر متعلقہ حکام کو بہتری کے احکامات جاری کیے۔
اس موقع پر کمشنر راولپنڈی کا کہنا تھا کہ سرکاری ہسپتالوں میں عوام کو بہتر طبی سہولیات فراہم کرنا ضلعی انتظامیہ کی اولین ترجیح ہے۔ انہوں نے ہدایت دی کہ مریضوں کو ادویات کی دستیابی اور علاج میں کسی قسم کی کوتاہی نہ برتی جائے۔کمشنر راولپنڈی نے ہسپتال کے مختلف وارڈز، ایمرجنسی، لیبارٹری اور او پی ڈی کا بھی تفصیلی معائنہ کیا اور صفائی کی صورتحال کو مزید بہتر کرنے کی ہدایت کی۔انہوں نے ہسپتال میں موجود طبی آلات اور مشینری کی حالت کا بھی جائزہ لیا اور ان کی بہتری کے لیے متعلقہ افسران سے رپورٹ طلب کی۔
ان کا کہنا تھا کہ عوام کو صحت کی بہتر سہولیات فراہم کرنے کے لیے تمام دستیاب وسائل بروئے کار لائے جائیں گے۔
Short Link: https://urdu.app.com.pk/urdu/?p=589725
