کوئی سیاستدان کبھی یہ نہیں کہتا کہ ہم مذاکرات نہیں کرینگے،جب ہم مذاکرات کی بات کرتے ہیں تو عمران خان گالیاں دیتا ہے، رانا ثناءاللہ خان

اسلام آباد۔2نومبر (اے پی پی):وفاقی وزیر داخلہ رانا ثناءاللہ خان نے کہا ہے کہ کوئی سیاستدان کبھی یہ نہیں کہتا کہ ہم مذاکرات نہیں کرینگے،جب ہم مذاکرات کی بات کرتے ہیں تو عمران خان گالیاں دیتا ہے۔وہ بدھ کو یہاں صحافیوں سے گفتگو کررہے تھے۔وزیر داخلہ رانا ثناءاللہ خان نے کہا کہ سوشل میڈیا سے متعلق ایف آئی کے قانون میں تبدیلی پر صحافی برداری ودیگر اسٹیک ہولڈرز سے مشاورت کریں گے،اگر بل کے ذریعے آزادی اظہار رائے پر قدغن لگے گی تو حکومت بل کو واپس لے گی۔

سوشل میڈیا میں کچھ چیزیں ایسی ہیں جن کو کنٹرول کرنا چا ہیئے ۔سوشل میڈیا کے ذریعے لوگوں کے نجی زندگی کو نقصان پہنچایا جارہا ہے۔یہ ایک سنجیدہ معاملہ ہے، اندیشہ ہے کہ آزادی اظہار رائے کو نقصان نہ پہنچے۔ انہوں نے کہا کہ اظہار رائے کی آزادی کو برقرار رکھتے ہوئے میڈیا اور صحافتی تنظیمیں ہماری رہنمائی کریں ۔

ایک سوال پر وزیر داخلہ رانا ثناءاللہ خان نے کہا کہ پارلیمنٹ میں بل حکومت ہی لاتی ہے، سوشل میڈیا سے متعلق ایف آئی اے کو اختیارات کی منتقلی پر مباحثہ ہوگا۔انہوں نے کہا کہ عمران خان کواسلام آباد کے داخلے کا معاملہ عدالت میں زیر سماعت ہے۔اگر عمران خان ہائیکورٹ کو یقین دہانی کراتے ہیں تو آنے دیا جائے گا۔

نواز شریف کے منع کرنے کے باوجود کیا حکومت مذاکرات کرے گی؟اس سوال پر وزیر داخلہ نے کہا کہ سیاست میں ہمیشہ مذاکرات کی حمایت کی جاتی ہے۔ عمران خان کے علاوہ کوئی سیاستدان کبھی یہ نہیں کہتا کہ ہم مذاکرات نہیں کریں گے ۔

Short Link: https://urdu.app.com.pk/urdu/?p=335625