اسلام آباد۔8اپریل (اے پی پی):وزیر اعظم عمران خان نے کہا ہے کہ ڈی ایٹ ممالک کو اقتصادی،سماجی،صحت اور دیگر چیلنجوں پر قابو پانے کیلئے ترقی یافتہ اور ترقی پذیر معیشتوں کی جانب سے عزم اور مالی وسائل کو فعال کرنے کی ضرورت ہے۔
جمعرات کو ڈی ایٹ سربراہ کانفرنس سے خطاب کرتے ہوئے وزیر اعظم۔نے کہا کہ کوڈ19 وبائی امراض سے 29 لاکھ سے زیادہ افراد ہلاک،اڑھائی کروڑ سے زیادہ افراد بے روزگار ہوگئے اور عالمی معاشی بحران کے نتیجے میں کھربوں ڈالر کا نقصان ہوا۔بالخصوص اس وائرس نے غریب ممالک اور ان کے غریب طبقات کو سخت نقصان سے دو چارکیا ،جس کے نتیجے میں امیر اور غریب ممالک اور ان ممالک کے اندر عدم مساوات میں اضافہ ہوا۔
وزیر اعظم نے کہا کہ ترقی پذیر ممالک کےلوگوں کو نہ صرف مہلک وائرس بلکہ بھوک سے بچنے کے چیلنجوں کا سامنا ہے۔انہوں نے کہا کہ آج ، دنیا نوجوانوں کی سب سے بڑی تعداد پر فخر کرتی ہے۔ وبائی امراض پھیلنے سے قبل دنیا بھر میں نوجوانوں کا پانچواں حصہ بے روزگار تھا اور 21 ویں صدی کے چیلنجوں کا مقابلہ کرنے کےلئے انہیں تعلیم اور ہنر تک رسائی نہیں۔وزیر اعظم نے کہا کہ ڈی -8 ممالک میں 550 ملین کی ابادی نوجوانوں پر مشتمل ہے۔
ہمارے نوجوانوں میں نہ صرف مواقعوں سے استفادہ کرنے کی صلاحیت ہے بلکہ مشترکہ چیلنجوں پر بھی قابو پا سکتے ہیں۔ہمیں ان نوجوانوں کیلئے لئے نئے مواقع پیدا کرنے ہونگے۔اس لئے ٹیکنالوجی کا استعمال ، انوویشن کا فروغ، نوجوانوں کی تعلیم ، ہنر اور تربیت میں سرمایہ کاری انتہائی ناگزیر ہے۔پاکستان میں ہم ‘کامیاب جوان٫ ، ہنرمند پاکستان ، یوتھ انٹرپرینیورشپ اسکیم ، اور ڈیجیٹل پاکستان جیسے پروگراموں کے ذریعے ان اقدامات پر عمل پیرا ہیں۔
وزیر اعظم نے کہا کہ موجودہ دور میں تبدیلی کی رفتار تیز ہو چکی ہے،انفارمیشن اور ٹیکنالوجی کی بریک تھروز کل کے سائنس فکشن کو تیزی سے آج کی حقیقت میں تبدیل کررہی ہے، پانچ سال قبل ، ورلڈ اکنامک فورم نے پیش گوئی کی تھی کہ چوتھا صنعتی انقلاب "ہمارے رہنے ، کام کرنے اور ایک دوسرے سے وابستہ رہنے کے انداز کو بنیادی طور پر بدل دے گا۔”آج ہم اس انقلاب کی آمد کو محسوس کر رہے ہیں۔
وزیر اعظم نے کہا کہ بدلی ہوئی دنیا کے ہم عصر عالمی چیلنج ایک متحرک ہدف ہیں۔ کوئی بھی ملک تنہا ان چیلنجوں پر قابو پا نہیں سکتا،اس کیلئے شراکت ضروری ہے۔انہوں نے کہا کہ۔مجھے خوشی ہے کہ ہمیں مل کر کام کرنے کیلئے ڈی ایٹ کا پلیٹ فارم موجود ہے۔وزیر اعظم نے تیزی سے بدلتی ہوئی دنیا کا مقابلہ کرنے کیلئے تین شعبوں پر خصوصی توجہ دینے کی تجاویز پیش کیں۔ ان میں کارکردگی اور پیداواری صلاحیت میں اضافے کیلئےٹیکنالوجی اورلاجسٹکس اور عالمی رسد کے سلسلے میں تسلسل برقرار رکھنے کے لئے نقل و حمل اور مواصلات کی بہتری شامل ہیں ۔
انہوں نے کہا کہ ڈی ایٹ ممالک کو عوام کی زندگیاں بچانے کیلئے کوڈ ویکسین کی فوری، سستی اور بروقت فراہمی کو یقینی بنانے کا مطالبہ کرنا چاہئے۔ عالمی سطح پر ویکسین تیار کرنے والی کمپنیوں کو لازمی طور پر ویکسین کی فراہمی اور پیداوار کو تیز کرنا چاہئے یا اپنی ٹیکنالوجی اور مہارت ترقی پذیر ممالک کے ساتھ شیئر کرنا ہوگی۔
وزیر اعظم نے کہا کہ آج ڈی ایٹ ممالک کی ابادی ایک ارب سے زیادہ افراد پر مشتمل ہے جبکہ مشترکہ جی ڈی پی 4 ٹریلین امریکی ڈالر سے زیادہ ہے۔وسائل اور کاروباری افراد، ہمارے پاس ترقی کے یہ دو نوں لازمی شرائط موجود ہیں – وزیر اعظم۔نے اس سلسلے ی۔ پانچ نکاتی روڈ میپ کی تجاویز پیش کرتے ہوئے کہا کہ ہمیں کوڈ وبائی امراض سے پیدا ہونے والے معاشی اور صحت کے بحرانوں سے نکلنے کے لئے مالی اعانت اور وسائل کو متحرک کرنا ہوگا۔
وبائی مرض کے نتیجے میں ترقی پذیر ممالک کو درپیش اقتصادی اور مالی چیلنجوں سے نمٹنے کے لئے ، میں نے پہلے ہی 5 نکاتی منصوبہ تجویز کیا ہے۔ اس میں : قرضوں میں ریلیف؛ ایس ڈی آر، کلائمیٹ فنانس کی فعالیت ؛ غیر قانونی مالی انخلا کا خاتمہ؛ اور ترقی پذیر ممالک کو چوری شدہ اثاثوں کی واپسی۔ شامل ہیں۔دو ئم، ڈی ایٹ ممالک کو باہمی تجارت 2030 تک موجودہ 100 ارب امریکی ڈالر سے بڑھا کر 500 ارب امریکی ڈالر تک بڑھانے کے ہدف کو حاصل کرنے کے لیے ٹھوس اقدامات اٹھانا چاہئے۔
اس میں سرحدی طریقہ کار کو سہل بنانا ، ادارہ جاتی رابطوں کو بڑھانا ، اور نئے اقدامات کو عملی شکل دینے جیسے اقدامات شامل ہونا چاہیں۔ہم مقامی کرنسیوں ادائیگی کیلئے ڈی ایٹ کارڈ جیسے خیالات کا خیرمقدم کرتے ہیں۔سوم ، ڈی ایٹ ممالک کو ثقافتی ، تعلیمی ، اور سائنسی اور کاروباری تبادلے کو فروغ کی غرض سے "یوتھ اینگیمنٹ اسٹریٹجی” تیار کرنا چاہئے۔
تعلیمی اداروں کے مابین وظائف ، ہنرکی نشوونما ، تربیت ، مشترکہ تحقیق ، اور خاص طور پر سائنس ، ٹیکنالوجی اور جدت کے میدان میں نوجوانوں کے لئے تبادلہ پروگرام کے ذریعے تعلیمی اداروں کے مابین روابط قائم کیے جائیں۔چار ، تکنیکی ترقی اقتصادی خوشحالی کا دروازہ ہے ، مسابقت کے لئے ہمیں علم پر مبنی معیشتوں کو فروغ دینا ، تحقیق اور نشوونما پر اخراجات میں اضافہ کرنا ، اور تیزی سے ڈیجیٹلائزیشن پر توجہ دینی ہوگی۔
ہمیں فوڈ سیکورٹی کو فروغ دینے ، صحت میں تعاون بڑھانا ، کھیلوں کے مشترکہ مقابلوں کا انعقاد اور قدرتی آفات کے دوران ایک دوسرے کی مدد کرنا چاہیئے۔ان مقاصد کے حصول کیلئےہمیں ترقی یافتہ اور ترقی پذیر معیشتوں کی جانب سے عزم اور مالی وسائل کو فعال کرنے کی ضرورت ہے۔وزیر اعظم نے کہا کہ نوجوانوں کو اپنی تمام تر صلاحیتیں بروئے کار لانے کیلئے حکومتوں ، بین الاقوامی مالیاتی اداروں ، کاروباری اداروں اور سول سوسائٹی کے مابین شراکت ضروری ہے۔
