لاہور۔24اپریل (اے پی پی):کورین سفیر کی قیادت میں وفد نے پی ایچ ای سے افسران کے ہمراہ یونیورسٹی آف انجینئرنگ اینڈ ٹیکنالوجی لاہور کا دورہ کیااور وائس چانسلر یو ای ٹی پروفیسر ڈاکٹر شاہد منیرسے ملاقات کی۔ا س موقع پرکورین سفیر نے کہا کہ پاکستان اور کوریاکے مابین مضبوط، نتیجہ خیز اور بلاتعطل دوطرفہ تعلقات دونوں ممالک میں تدریسی روابط کو ترویج دینے میں معاون ثابت ہوسکتے ہیں۔
ڈاکٹر شاہد منیر نے بتایا کہ یو ای ٹی بین الاقوامی شہرت کی حامل اور اسی وجہ سے یہاں مختلف ممالک سے طلبہ زیر تعلیم ہیں ،انہیں بہترین تعلیم و تربیت دینے کی غرض سے ملکی و غیر ملکی اداروں سے روابط قائم رکھے ہوئے ہیں تاکہ تکنیکی صلاحیتوں کو مزید نکھارا جا سکے۔ انہوں نے اس بات کا اعادہ کرتے ہوئے کہا کہ آپس میں اساتذہ اور طلبہ کے تبادلے کے ساتھ ساتھ مشترکہ مفادات کے شعبہ جات میں باہم تحقیق کو فروغ دینے کیلئے معاہد ہ کی گنجائش بھی موجود ہے جس سے یقینی طور پر دو طرفہ تعلقات کو واضح مقصدیت حاصل ہو سکے گی۔
وفدنے کہا کہ کوریامیں انجینئرنگ کے شعبہ میں بہت صلاحیت موجود ہے جس سے پاکستانی اداروں کو فائدہ اٹھانا چاہیئے، اس حوالے سے سفارت خانہ ذاتی دلچسپی لے رہا ہے۔ انہوں نے یقین دلایا کہ دو طرفہ تدریسی اداروں کے مابین تعلقات قائم کروانے میں سفارت خانہ معاون ثابت ہو گا تاکہ انجینئرنگ کی تعلیم اورایک دوسرے کے تجربات سے مستفید ہوا جاسکے۔ آخر میں وائس چانسلر نے سفیرکو اعزازی شیلڈ پیش کی۔
Short Link: https://urdu.app.com.pk/urdu/?p=587381
