ملتان۔ 16 فروری (اے پی پی):سیکرٹری زراعت پنجاب افتخار علی سہو نے کہا ہے کہ صوبہ پنجاب میں کپاس کی اگیتی کاشت کیلئے 10لاکھ ایکڑ رقبہ کا ہدف مقرر کیا گیا ہے،کپاس کی اگیتی کاشت کا وقت 15 فروری سے 31 مارچ ہے،کپاس کی کاشت کا ہدف ایک چیلنجنگ ٹاسک ہے،کپاس کی اگیتی کاشت کیلئے پنجاب کی چھ ڈویژنز کو موزوں قرار دیا گیا ہے،صوبہ پنجاب میں کپاس کی اگیتی کاشت پر کاشتکاروں کی 25 ہزار روپے مالی اعانت کرنے کا فیصلہ بھی کیا گیا ہے۔تفصیلات کے مطابق اتورا کو یہاں سیکرٹری زراعت پنجاب کی زیر صدارت کپاس کی اگیتی کاشت کیلئے مرتب کردہ حکمت عملی کا جائزہ لینے کیلئے ایک اعلیٰ سطحی اجلاس کا انعقاد ہوا۔اس موقع پر سیکرٹری زراعت پنجاب افتخارعلی سہو نے واضح کیا کہ کپاس کی اگیتی کاشت کیلئے تمام متعلقہ افسران وعملہ کو اہداف تفویض کر دیئے گئے ہیں
ہدف کے حصول کیلئے فیلڈ میں متحرک اورفعال کردار ادا کرنے کا خصوصی ٹاسک دیا گیا ہے۔انہوں نے کہا کہ موسمیاتی تبدیلیوں کے تناظر میں کپاس کی اگیتی کاشت سے بہترنتائج برآمد ہوئے ہیں،کپاس کی مہم کامیاب بنانے کیلئے ڈویژنل،ڈسٹرکٹ اورتحصیل کی سطح پرکاٹن مینجمنٹ کمیٹیاں تشکیل دی جا چکی ہیں-انہوں نے مزید کہا کہ مارکیٹس میں معیاری زرعی مداخل کی دستیابی یقینی بنانے کیلئے سخت مانیٹرنگ کا عمل جاری ہے۔ اجلاس میں سپیشل سیکرٹری زراعت جنوبی پنجاب سرفراز حسین مگسی، ایڈیشنل سیکرٹری زراعت ٹاسک فورس پنجاب رانا شبیراحمد خان،وائس چانسلر پروفیسرڈاکٹراشتیاق احمد رجوانہ،ڈائریکٹرجنرلز زراعت عبدالحمید،نوید عصمت کاہلوں،ڈاکٹر عامر رسول، ڈاکٹرساجد الرحمان،عبدالقیوم،کنسلٹنٹ محکمہ زراعت ڈاکٹرمحمد انجم علی،ڈاکٹرآصف علی،صدرکسان اتحاد خالد کھوکھر اورڈاکٹرمحمداقبال بندیشہ سمیت دیگر افسران و سٹیک ہولڈرز نے شرکت کی۔
بعد ازاں سیکرٹری زراعت پنجاب افتخارعلی سہو نے ملتان میں زیرتعمیرماڈل ایگریکلچرمال کا دورہ کیا اورماڈل ایگریکلچرمال کے جاری تعمیراتی کاموں کا جائزہ لیا۔سیکرٹری زراعت پنجاب نے ماڈل ایگریکلچرمال کے تعمیراتی کام کی رفتار پراطمینان کا اظہار کرتے ہوئے کہا کہ ماڈل ایگریکلچرمال صرف منظور شدہ ڈیزائن کے مطابق ہی تعمیرکیاجائے۔ سیکرٹری زراعت پنجاب افتخارعلی سہو نے محکمہ بلڈنگ کے افسران کو جلد تعمیر مکمل کرنے کی ہدایت کی۔اس موقع پر بریفنگ دیتے ہوئے محکمہ بلڈنگ کے افسران نے سیکرٹری زراعت پنجاب کو بتایا کہ ماڈل ایگریکلچرمال کا 80 فیصد کام مکمل ہوچکا ہے،ماڈل ایگریکلچرمال کا ملحقہ ایریا جدید زرعی ٹیکنالوجی کا عملی نمونہ ہوگا۔
Short Link: https://urdu.app.com.pk/urdu/?p=561556
