ملتان۔ 26 اپریل (اے پی پی):سیکرٹری زراعت پنجاب افتخار علی سہو نے کہا ہے کہ وزیر اعلی پنجاب مریم نواز شریف کپاس کی بحالی کیلئے پر عزم ہیں،کپاس کی بحالی درحقیقت ملکی معیشت کی بحالی ہے،پنجاب میں 35 لاکھ ایکڑ رقبہ پر کپاس کی کاشت کا ہدف مقررکیا گیا ہے۔ان خیالات کا اظہار انہوں نے ہفتہ کو یہاں محمد نواز شریف زرعی یونیورسٹی میں کپاس کی کاشت بارے منعقدہ اجلاس کے دوران گفتگو کرتے ہوئے کیا۔
اجلاس میں سپشل سیکرٹری جنوبی پنجاب سرفراز خان مگسی، چئیرمین فیڈرل سیڈ اتھارٹی ڈاکٹر آصف علی، ایڈیشنل سیکرٹری زراعت ٹاسک فورس پنجاب محمد شبیر احمد خان، ڈائریکٹر جنرلز زراعت چوہدری عبدالحمید، نوید عصمت کاہلوں،ساجد الرّحمان، ڈاکٹر عبد القیوم، عامر رسول، کنسلٹنٹ محکمہ زراعت پنجاب ڈاکٹر محمد انجم علی، ڈین فیکلٹی ایگریکلچر محمد نواز شریف زرعی یونیورسٹی ملتان ڈاکٹر شفقت سعید سمیت ترقی پسند کاشتکار خالد محمود کھوکھر، حسن رضا، زرعی سائنسدان ڈاکٹر اقبال بندیشہ سمیت ڈائریکٹرز زراعت توسیع ملتان، ڈی جی خان، بہاولپور نے شرکت کی جبکہ دیگر ڈویژنل ڈائریکٹرز زراعت توسیع نے آن لائن شریک ہوئے۔افتخار علی سہو نے کہا کہ تاریخ میں پہلی بار کپاس کی اگیتی کاشت کی مہم چلائی گئی ہے،اگیتی کاشت کی منفرد مہم کے نتیجہ میں کل ہدف کاتقریباً 25 فیصد سے زائد حاصل کیا جا چکا ہے۔
انہوں نے کہا کہ 30 اپریل تک کپاس کی کاشت کے دوسرے مرحلہ کے ہدف کے حصول کیلئے فیلڈ سرگرمیاں جاری ہیں،کپاس کی کاشت کے تیسرے مرحلے کا آغاز یکم مئی سے ہوگا،پانچ ایکڑ اگیتی کاشت کی صورت میں کاشتکاروں کو 25 ہزار روپے دیئےجا رہے ہیں۔سیکرٹری زراعت پنجاب نے واضح کیا کہ کپاس کی کاشت کے مجموعی ہدف کا90 فیصد سے زائد جنوبی پنجاب سے حاصل کیا جائے گاجبکہ کل ہدف کا 50 فیصدبہاولپور ڈویژن سے حاصل کیا جائے گا۔انہوں نے مزید کہا کہ کپاس کی کاشت کے علاقوں میں نہری پانی ترجیحی بنیادوں پر فراہم کیا جا رہا ہے،کپاس کی اگیتی کاشت کی نگہداشت بارے کاشتکاروں کی رہنمائی بھی جاری ہے،کپاس کی کاشت کی مہم میں کاشتکاروں کا مثبت ردِ عمل قابلِ ستائش ہے۔
Short Link: https://urdu.app.com.pk/urdu/?p=588266
