فیصل آباد۔ 19 مارچ (اے پی پی):محکمہ زراعت نے شہریوں کو کچن گارڈننگ پروگرام کے تحت چھوٹی کیاریوں میں لگائی گئی سبزیوں کو فوارے کی مدد سے پانی فراہم کرنے کی ہدایت کی ہے اور کہاہے کہ جن افراد نے گھریلو سطح پر کچن گارڈننگ پروگرام کے تحت موسم گرما کی سبزیاں کاشت کی ہیں وہ کیاریوں کو کھلا پانی لگانے کی بجائے صبح یا شام کے وقت حسب ضرورت فوارے کی مدد سے پانی لگائیں تاکہ بیج اور سبزیوں کو جمنے میں کسی نقصان کا سامنا نہ کرناپڑے۔
ڈپٹی ڈائریکٹرمحکمہ زراعت توسیع فیصل آباد عدیل احمد نے اے پی پی کو بتایا کہ چونکہ جڑی بوٹیاں فصل کی خوراک، پانی اور روشنی میں حصہ دار بننے کے ساتھ ساتھ بیماریوں اور کیڑے مکوڑوں کے پھیلاؤ میں بھی مدد گار ثابت ہوتی ہیں لہٰذا بذریعہ گوڈی ان کا بروقت تدارک بھی اشد ضروری ہے۔
انہوں نے کہاکہ نرسری کے ذریعے لگائی جانیوالی سبزیات جالی یا ململ کی چھوٹی ٹنل بنا کر کاشت کی جائیں تاکہ ننھے منے پودوں کو پرندوں،کیڑے مکوڑوں اور بیماریوں سے محفوظ رکھا جاسکے۔
Short Link: https://urdu.app.com.pk/urdu/?p=574182
