فیصل آباد۔ 29 اگست (اے پی پی):خوردنی تیل کی بڑھتی ہوئی ضروریات کوپورااور کینولا کی زیادہ سے زیادہ کاشت سمیت کاشتکاروں کو جدید پیداواری ٹیکنالوجی سے آگاہی اور مکمل معلومات کی فراہمی کیلئے فیصل آباد ڈویژن سمیت صوبہ بھر میں فیلڈ ڈیز کے انعقاد کااعلان کیا گیا ہے جس میں مختلف تحقیقی اداروں کے سائنسدان، محکمہ زراعت، نیشنل ایگریکلچرل ریسرچ سنٹر، پاکستان آئل سیڈ ڈویلپمنٹ بورڈ کے حکام و ماہرین زراعت کاشتکاروں کو خصوصی لیکچر دیں گے اور انہیں زیادہ سے زیادہ رقبہ پر کینولا کاشت کرنے کی ترغیب دی جائے گی تاکہ ملک میں بڑھتی ہوئی آبادی کے تناسب سے خوردنی تیل کی ضرورت پوری کرنے کے ساتھ ساتھ درآمدات پر خرچ ہونے والا قیمتی زرمبادلہ بچایاجاسکے۔
نظامت زرعی اطلاعات محکمہ زراعت پنجاب کے ترجمان کے مطابق اس ضمن میں کاشتکاروں کو کینولاکا انتہائی اعلیٰ معیار اور بہترین پیداواری صلاحیت کاحامل تصدیق شدہ و معیاری ہائبرڈ بیج ارزاں نر خوں پر فراہم کرنے کیلئے بھی اقدامات کئے جائیں گے تاکہ وہ بمپر کراپ حاصل کرنے کے قابل ہو سکیں۔ انہوں نے بتایاکہ ماہ ستمبر کے دوران کاشتکاروں کیلئے خصوصی و جامع آگاہی مہم بھی شروع کی جا رہی ہے جس کے مثبت نتائج حاصل ہونے کا امکان ہے۔
