لاہور۔4مئی (اے پی پی):لاہور سمیت صوبہ بھر میں انٹیلی جنس بیسڈ سرچ، سویپ اینڈ کومبنگ آپریشنز جاری ہیں جس کے تسلسل میں گذشتہ 24 گھنٹوں کے دوران 468 کومبنگ آپریشنز، 15500مشتبہ افراد کی چیکنگ اور 47 مشکوک افراد حراست میں لئے گئے۔ ترجمان پنجاب پولیس نے تفصیلات سے آگاہ کرتے ہوئے کہا کہ41 سرچ اینڈ سویپ آپریشنز، 3368 افراد سے پوچھ گچھ اور 04 مشتبہ افراد کو گرفتار کیا گیا ہے۔
سنگین جرائم میں ملوث 137 اشتہاری، 74 عدالتی مفرور اور 45 عادی مجرمان بھی گرفتار کیے گئے۔ جرائم پیشہ و مشتبہ افراد کے قبضہ سے بڑی تعداد میں ناجائز اسلحہ اور گولیاں برآمد کی گئیں۔ جرائم پیشہ افراد کے خلاف کاروائی کے دوران 09 مجرمان کیفر کردار کو پہنچے جبکہ دو مجرمان زخمی ہوئے۔ آئی جی پنجاب نے کہا کہ سنگین وارداتوں میں ملوث مجرمان کے خلاف سرچ اور کومبنگ آپریشنز میں مزید تیزی لائی جائے۔
دہشت گردوں اور جرائم پیشہ عناصر کی سرکوبی کے لئے پنجاب پولیس کی فرضی مشقیں بھی جاری ہیں۔فرضی مشقوں میں پنجاب پولیس، سی ٹی ڈی، سپیشل برانچ، ایلیٹ فورس، ریسکیو 1122 اور قانون نافذ کرنے والے اداروں کی ٹیمیں حصہ لے رہی ہیں۔
Short Link: https://urdu.app.com.pk/urdu/?p=592360
