اسلام آباد۔29اگست (اے پی پی):ملک میں ضروری اشیاء کی قیمتوں میں ہفتہ وار بنیادوں پر0.62فیصد اور سالانہ بنیادوں پر3.57فیصد اضافہ ریکارڈ کیا گیا ہے۔ادارہ برائے شماریات پاکستان (پی بی ایس) کی جانب سے قیمتوں کے حساس اشاریہ بارے ہفتہ وار رپورٹ کے مطابق 28ا گست کو ختم ہونے والے ہفتے میں قیمتوں کا حساس اشاریہ 331.14پوائنٹس ریکارڈکیا گیا جو پیوستہ ہفتے میں 329.11 اور گزشتہ سال 29 اگست 319.73پوائنٹس ریکار ڈ کیا گیا تھا۔ گزشتہ ہفتے کے دوران روزمرہ استعمال کی چھ ضروری اشیاء کی قیمتوں میں کمی اور 27کی قیمتوں میں استحکام رہا۔
اس کے برعکس 18 ضروری اشیاء کی قیمتوں میں اضافہ ہوا۔ گزشتہ ہفتے کے دوران ٹماٹرکی قیمت میں 14.98فیصد، آٹا12.11فیصد،چکن 3.36فیصد، آلو1.52فیصد، سرسوں کا تیل 1.37فیصد، انڈے1.03فیصد، ایل پی جی 0.82فیصد، پکا ہوا بڑا گوشت 0.81فیصد، لہسن0.78فیصد، پرنٹڈ لان 0.23فیصد،جلانے کی لکڑی0.17فیصد اور لانگ کلاتھ کی قیمت میں 0.11فیصد اضافہ ریکارڈ کیا گیا ۔
اس کے برعکس دال ماش کی قیمت میں 0.43فیصد، دال مسور0.28فیصد، دال چنا0.28فیصد،کیلا0.12فیصد، اڑھائی کلو بناسپتی گھی0.10فیصد اور پیاز کی قیمت میں 0.01فیصدکی کمی ہوئی۔
سب سے کم یعنی 17732 روپے ماہوار آمدنی رکھنے والے گروپ کے لئے قیمتوں کے حساس اشاریے میں ہفتے وار بنیادوں پر0.84فیصد کا اضافہ ہوا،17733روپے سے لے کر 22888 روپے ،22889 روپے سے لے کر29517 روپے،29518 روپے سے لے کر44175 روپے اور اس سے زیادہ ماہوار آمدنی رکھنے والے گروپوں کےلئے قیمتوں کے حساس اشاریے میں بالترتیب 0.83فیصد،0.73فیصد،0.69فیصد اور0.51فیصد کا اضافہ ریکارڈکیا گیا۔
صارفین کےلئے قیمتوں کے حساس اشاریے کا تعین ملک کے 17بڑے شہروں کی 50 مارکیٹوں میں 51 ضروری اشیاء کی قیمتوں میں رد وبدل کی بنیاد پر کیا جاتا ہے۔
