اسلام آباد۔10مارچ (اے پی پی):اسلام آبادہائی کورٹ نے گستاخانہ مواد پھیلانے پر پیکا ایکٹ کے تحت درج مقدمہ میں گرفتار ملزم بابر خورشید کی درخواست ضمانت مسترد کر دی ۔ عدالت نے کہا ٹیکنیکل اینالسز رپورٹ بظاہر درخواست گزار کا جرم میں ملوث ہونا ثابت کرتی ہے۔ کیس کے میرٹس پر جائے بغیر عدالت سمجھتی ہے کہ اس مرحلے پر ملزم ضمانت کا حقدار نہیں۔ضمانت کیس میں دی گئی عدالتی آبزرویشنز ٹرائل کورٹ میں کیس پر اثرانداز نہیں ہوں گی۔ اسلام آبادہائی کورٹ کے جسٹس محمد اعظم خان نے گستاخانہ مواد پھیلانے پر گرفتار ملزم بابر خورشید کی درخواست ضمانت مسترد کرنے کا تحریری فیصلہ جاری کر دیا ۔ ایف آئی اے نے گستاخانہ مواد کی تشہیر پر پیکا ایکٹ کی سیکشن 11 کے تحت مقدمہ درج کیا تھا ۔
عدالت نے لکھا پٹیشنر کے وکیل کے مطابق مدعی نے ایف آئی اے اتھارٹیز سے مل کردرخواست گزار کیخلاف مقدمہ درج کرایا۔ پٹیشنر مقدمہ کا نامزدملزم نہیں ، درخواست گزار کو10ماہ بعد کیس میں ملوث کیا گیا۔ عدالت نے فیصلے میں لکھا ریکارڈ کے مطابق تفتیش کے دوران پٹیشنر ملزم سے برآمد موبائل فون سے گستاخانہ مواد بذریعہ وٹس ایپ بھجوایا گیا ، ٹیکنیکل اینالسز رپورٹ کے مطابق ملزم کے موبائل فون سے گستاخانہ خاکے، گرافکس اور تصاویر شیئر کی گئیں۔رپورٹ میں یہ بات بھی سامنے آئی کہ توہین رسالت، توہین اہل بیعت اور توہین قرآن کا مواد شیئر کیا گیا۔ عدالت نے لکھا پولیس ریکارڈ کے مطابق جس موبائل فون سے گستاخانہ مواد شیئر کیا گیا وہ ملزم کے نام پر رجسٹرڈ ہے۔ عدالت سمجھتی ہے کہ اس مرحلے پر پٹیشنر ملزم ضمانت کاحقدار نہیں۔
Short Link: https://urdu.app.com.pk/urdu/?p=570909
