گلگت۔27اگست (اے پی پی):وفاقی وزیر برائے امور کشمیر و گلگت بلتستان انجینئر امیر مقام نے دنیور میں حالیہ منوگاہ سانحے میں جاں بحق ہونے والے افراد کے لواحقین سے تعزیت کی اور مرحومین کے ایصال ثواب کے لیے فاتحہ خوانی کی۔ انہوں نے کہا کہ دنیور سانحے میں جان دینے والے افراد کی قربانی کو ہمیشہ یاد رکھا جائے گا۔
انہوں نے رضاکاروں کو خراج تحسین پیش کرتے ہوئے کہا کہ گلگت بلتستان کے عوام ملک کے سرحدی محافظ ہیں اور ان کی قربانیاں پاکستان کے لیے قابل فخر ہیں۔وفاقی وزیر نے بتایا کہ وزیراعظم محمد شہباز شریف خود گلگت بلتستان میں سیلابی صورتحال کی نگرانی کر رہے ہیں اور شہداکے لواحقین کو وفاقی حکومت کی جانب سے فی کس 20 لاکھ روپے دیے جائیں گے۔
انہوں نے کہا کہ زخمیوں کے علاج کے لیے تمام وسائل بروئے کار لائے جائیں گے اور ان کی خدمات کے اعتراف میں انہیں ایوارڈ بھی دیئے جائیں گے۔انجینئر امیر مقام نے اعلان کیا کہ شہدا کی یاد کو زندہ رکھنے کے لیے ان کے نام پر یادگار یا کوئی سینٹر قائم کیا جائے گا تاکہ ان کی قربانی کو آنے والی نسلیں بھی یاد رکھ سکیں۔
