اسلام آباد۔29اپریل (اے پی پی):وفاقی وزیر برائے موسمیاتی تبدیلی سینیٹر شیری رحمٰن نے محکمہ داخلہ، صوبائی ڈیزاسٹر مینجمنٹ اتھارٹیز اور پی ایم ڈی کی صوبائی ٹیموں پر زور دیا ہے کہ وہ گلگت بلتستان اور خیبرپختونخوا میں علاقائی درجہ حرارت میں اضافے کی وجہ سے ممکنہ طور پر برفانی جھیلوں کے ٹوٹنے اور سیلاب کے واقعات سے نمٹنے کے لیے موثر انداز میں احتیاطی تدابیر اختیار کریں۔
انہوں نے کہاکہ وزارت موسمیاتی تبدیلی نے متعلقہ اداروں کو ایک ایڈوائزری نوٹ میں ایک باضابطہ انتباہ جاری کیا ہے، جس میں خاص طور پر کے پی اور جی بی کے علاقوں میں برفانی جھیلوں کے ٹوٹنے سے سیلابوں کے ممکنہ واقعات کی طرف توجہ مبذول کرائی گئی ہے۔ وزارت موسمیاتی تبدیلی کے مطابق خطے میں موسمی تبدیلی کی وجہ سے GLOF اور سیلاب کے واقعات میں اضافہ ہوا ہے۔ این ڈی ایم اےاس معاملے کے لیے مجاز اتھارٹی ہے، تمام اسٹیک ہولڈرز کے لیے ضروری ہے کہ وہ کسی بھی صورت حال کے پیش نظر خطرات سے دوچار آبادیوں کے جانی یا مالی نقصان کو روکنے کے لیے مؤثر اور بروقت احتیاطی اقدامات کریں۔
انہوں نے کہا کہ درجہ حرارت میں اضافے کی وجہ سے، پاکستان کے شمالی پہاڑی سلسلوں (ہندوکش، ہمالیہ اور قراقرم) میں گلیشیئر تیزی سے پگھل رہے ہیں اور گلگت بلتستان اور خیبر پختونخواہ میں کل 3,044 برفانی جھیلیں بنی ہیں۔ ان میں سے 33 برفانی جھیلوں کا اندازہ لگایا گیا ہے کہ وہ گلیشیئل لیک آؤٹ برسٹ فلڈنگ (GLOF) کے خطرات کا شکار ہیں جس کی وجہ سے جی بی اور کے پی میں 7.1 ملین سے زیادہ لوگ غیر محفوظ ہیں۔ ابتدائی انتباہی نظام، بہتر انفراسٹرکچر اور کمیونٹی پر مبنی ڈیزاسٹر رسک مینجمنٹ کے ذریعے کمزور کمیونٹیز کو GLOF کے خطرات کے لیے تیاری اور ان کو کم کرنے میں مدد کے لیے موجودہ اقدامات کیے جا رہے ہیں۔ انہوں نے مزید کہا کہ جنوبی ایشیا، خاص طور پر بھارت اور پاکستان کو ریکارڈ توڑ گرمی کی لہر کا سامنا ہے۔
موسم کی پیش گوئی کرنے والے عالمی اداروں نے پیش گوئی کی ہے کہ پاکستان اور بھارت میں اس سال درجہ حرارت 49 سے 50 ڈگری سینٹی گریڈ تک بڑھ سکتا ہے جو کہ موسمیاتی تناؤ کا براہ راست نتیجہ ہے۔ پاکستان میں درجہ حرارت میں اوسط سے 6 سے 8 ڈگری سینٹی گریڈ تک اضافے کی پیش گوئی کی گئی ہے۔ انہوں نے کہا کہ متعلقہ وفاقی اور صوبائی اسٹیک ہولڈرز کی جانب سے ممکنہ GLOF واقعات کے منفی نتائج سے نمٹنے کے لیے افراد اور کمیونٹیز کی صلاحیت کو بڑھانے کے اقدامات اٹھانے کی ضرورت ہے۔
