اسلام آباد۔22اگست (اے پی پی):پاک فوج نے گلگت بلتستان کی تحصیل گوپس میں گلیشیر پھٹنے پرفوری ریسکیو آپریشن شروع کر دیا ہے،گلگت بلتستان کی تحصیل گوپس کے علاقے تالی داس کے گاؤں روشان میں گلیشئر جھیل پھٹنے سے شدید سیلابی صورتحال کا سامنا ہےاور شدید سیلاب نے مقامی آبادی کو خطرات سے دوچار کردیا ہے۔گلیشئر پھٹنے کے نتیجہ میں دریائی پانی کا بہاؤ رکنے سے قریبی آبادی محصور ہو چکی ہے ،زمینی کٹاؤ نے صورتحال کو مزید سنگین بنا دیا ہے،زمینی راستے متاثر ہونے سے مقامی افراد تک رسائی محدود ہو چکی جبکہ متاثرین فوری ریسکیو کے منتظر ہیں۔
واضح رہے کہ جی بی سکاؤٹس کوئیک ری ایکشن فورس(کیو آر ایف ) کو جائے وقوعہ کی جانب روانہ کر دیا گیا ہے ،جی بی سکاؤٹس کو فوری روانہ کرنے کا مقصد متاثرین کو محفوظ مقامات پر منتقل کرنا ہے۔دوسری جانب سول انتظامیہ اور ریسکیو 1122 نے بھی فوری طور پر تمام وسائل کو متحرک کردیا ہے۔
اسی طرح فرنٹیئر کور ناردرن ایریاز (ایف سی این اے) کی جانب سے بھی ریسکیو مشن کی تیاری مکمل کر لی گئی ہے۔یہ مشن ہیلی کاپٹر کے ذریعے انجام دیا جائے گااس کا مقصد دشوار گزار علاقوں میں پھنسے افراد کو فوری طور پرنکالنا ہے۔متاترین نے حکام سے اپیل کی ہے کہ فوری طور پر اقدامات کرکے قیمتی جانوں کو بچایا جائے۔
