گنے کی اضافی پیداوار سےملکی ضروریات کے ساتھ ساتھ زرمبادلہ بھی کمایا جاسکتا ہے، رمضان شاہد

فیصل آباد۔ 26 ستمبر (اے پی پی):معروف شوگر کین سپیشلسٹ و ماہر زراعت رمضان شاہدنے کہا ہے کہ گنے کے پیداوار میں اضافے سے ملکی ضروریات پوری کرنے کے ساتھ ساتھ چینی کی اضافی پیداواربرآمد کرکے قیمتی زرمبادلہ کمایا جاسکتا ہے۔ انہوں نے کہا کہ ملک بھر کی 95میں سے 57شوگر ملز پنجاب میں کام کر رہی ہیں اس لئے ان ملز کے تناسب سے گنے کی پیداوارمیں اضافہ ضروری ہے ۔

انہوں نے کہا کہ پاکستان میں گنے کی فی ایکڑ اوسط پیداوار عالمی اوسط پیداوار کے مقابلے میں انتہائی کم ہے اس لئے اگر کاشتکاروں کو تمام سہولیات کی فراہمی یقینی بنانے کے علاوہ انہیں جدید ٹیکنالوجی کے استعمال کی جانب راغب کیا جائے تو گنے کی پیداوار میں اضافہ کر کے بھر پو ر فائدہ اٹھایا جاسکتاہے جس کے لئے زرعی تحقیقی اداروں کے سائنسدانوں، ماہرین زراعت اور محکمہ زراعت کی خدمات بھی ہمہ وقت حاضرہیں۔

انہوں نے بتایا کہ ایوب ریسرچ کی تیار کردہ گنے کی اقسام کی پیداواری استعداد بہت زیادہ ہے اس لئے جدید سفارشات پر عمل کر کے کاشتکار ان اقسام کی پیداوار ی صلاحیت کے مطابق گنے کی پیداوار میں اضافہ کر سکتے ہیں۔انہوں نے کہا کہ نامیاتی کھادکے استعمال سے بھی گنے کی فی ایکڑ پیداوار میں کئی گنا اضافہ کیا جا سکتا ہے۔

Short Link: https://urdu.app.com.pk/urdu/?p=505707