اسلام آباد۔28اپریل (اے پی پی):گورنر خیبرپختونخوا فیصل کریم کنڈی نے اسلام آباد میں فریڈم گیٹ پراسپیریٹی فورم کا باضابطہ افتتاح کر دیا۔پیر کو گورنر آفس کی جانب سے جاری بیان کے مطابق گورنر فیصل کریم کنڈی نےافتتاحی تقریب میں بطورمہمان خصوصی شرکت کی۔
افتتاحی تقریب میں ڈپٹی سپیکر سندھ اسمبلی انتھونی نوید،سابق نگران صوبائی وزیر عدنان جلیل، چیف ایگزیکٹو آفیسر فریڈم گیٹ پراسپیریٹی محمد انورو دیگر سماجی شخصیات نے شرکت کی۔ تقریب کے افتتاحی کلمات میں سی ای او فریڈم گیٹ پراسپیریٹی محمد عمران نے ادارہ کے اغراض و مقاصد کے بارے شرکاکو آگاہ کیا اور گورنر خیبر پختونخوا کا بحیثیت مہمان خصوصی تقریب میں ںشرکت پر ان کا شکریہ ادا کیا۔
اس موقع پر تقریب سے خطاب کرتے ہوئے گورنر فیصل کریم کنڈی نے فریڈم گیٹ پراسپیریٹی کے افتتاح پر انتظامیہ کو مبارکباد پیش کرتے ہوئے فورم کے قیام کو بہترین اقدام قرار دیتے ہوئے کہا کہ سول سوسائٹی کی تنظیمیں ملک میں ترقیاتی خلا کو پر کرنے میں کلیدی کردار ادا کرتی ہیں۔ انہوں نے کہا کہ فریڈم گیٹ پراسپیریٹی، فریڈرک ناؤمن فاؤنڈیشن کے 25 سالہ شاندار ورثے کو آگے بڑھا رہی ہے۔انہوں نے کہا کہ موجودہ دور میں جب پاکستان کو ماحولیاتی تبدیلی، عدم مساوات جیسے چیلنجز کا سامنا ہے تو کمیونٹی کی قیادت میں عوامی مرکزیت پر مبنی اقدامات ناگزیر ہیں۔
گورنر کے پی نے کہا کہ فریڈم گیٹ پراسپیریٹی نے اپنی توجہ کمیونٹی امپاورمنٹ، ماحولیاتی اقدامات، نوجوانوں کی شمولیت اور ڈیجیٹل وسائل تک رسائی پر مرکوز کر کے درست سمت کا انتخاب کیا ہے۔ انہوں نے ادارے پر زور دیا کہ وہ حکومت، نجی شعبے، تعلیمی اداروں، میڈیا اور دیگر این جی اوز کے ساتھ شراکت داری کو فروغ دے تاکہ اس کے مثبت اثرات کو وسیع کیا جا سکے۔
Short Link: https://urdu.app.com.pk/urdu/?p=589239
