اسلام آباد۔6مئی (اے پی پی):گورنر خیبرپختونخوا فیصل کریم کنڈی نے اسلام آباد میں وفاقی وزیر برائے اوورسیز پاکستانیز چوہدری سالک حسین سے ملاقات کی۔ملاقات میں رکن صوبائی اسمبلی احمد کریم کنڈی بھی موجود تھے۔منگل کو گورنر آفس سے جاری بیان کے مطابق ملاقات میں بیرون ممالک روز گار اور ہنر کی فراہمی کے حوالے سے مختلف تجاویزپر اور خلیجی ممالک میں پاکستانیوں بالخصوص خیبرپختونخوا کے عوام کو درپیش مسائل پر تبادلہ خیال کیاگیا۔
اس موقع پر گورنر نے کہاکہ خیبرپختونخوا کے لوگوں کو بیرون ممالک میں روز گار کے حوالے سے مسائل کا سامنا ہے۔انہوں نے بتایا کہ ڈیرہ اسماعیل خان میں لیبر کالونی، ہسپتال اور پروٹیکٹر آفس کا قیام ضروری ہے ، خیبر پختو نخوا کے لوگوں کیلئے بیرون ممالک نوکریوں اور ہنر کی فراہمی کے پروگرامز میں کوٹہ مختص کیا جائے۔فیصل کریم کنڈی نے وفاقی وزیر کوخیبرپختونخوا کے دورہ کی دعوت بھی دی۔
وفاقی وزیر چوہدری سالک حسین نے کہاکہ بیرون ملک روز گار کی فراہمی کے حوالے سے خیبرپختونخوا ترجیحات میں شامل ہے،حکومت نوجوانوں کو میرٹ اور صلاحیت کی بنیاد پر مواقع فراہم کرنے کیلئے پر عزم ہے، اسلام آباد کے بعد پنجاب نے بھی اوورسیز پاکستانیوں کیلئے خصوصی عدالتیں قائم کرنے کی منظوری دی ہے۔
وفاقی وزیر نے کہاکہ خیبر پختونخوا میں بھی اوورسیز پاکستانیوں کے مسائل کے حل کیلئے خصوصی عدالتوں کے قیام کیلئے قانون سازی کی ضرورت ہے۔اس موقع پر گورنر فیصل کریم کنڈی نے خیبرپختونخوا میں اوورسیز پاکستانیوں کیلئے خصوصی عدالتوں کے قیام کیلئے ہر ممکن تعاون کی یقین دہانی کرائی۔
Short Link: https://urdu.app.com.pk/urdu/?p=593412
