گورنر خیبر پختونخوا فیصل کریم کنڈی سے چیف کلیکٹر کسٹمز خواجہ خرم نعیم کی ملاقات،ادارہ جاتی امور بارے تبادلہ خیال کیا

پشاور۔ 29 نومبر (اے پی پی):گورنر خیبر پختونخوا فیصل کریم کنڈی سے چیف کلیکٹر کسٹمز خواجہ خرم نعیم نے گورنر ہائوس میں ملاقات کی اور ادارہ جاتی امور بارے تبادلہ خیال کیا۔گورنر ہائوس پشاور سے جاری بیان کے مطابق ملاقات میں ادارہ جاتی امور و فرائض پر تبادلہ خیال کیا گیا۔

گورنر نے ٹیکسوں کی وصولی، سمگلنگ کے خاتمے اور کسٹمز کے معاملات مزید بہتر بنانے کی ضرورت پر زور دیا۔فیصل کریم کنڈی نے کہا کہ صوبے میں تجارتی آمدورفت کے فروغ کے لیے وفاقی سطح پر اقدامات ضروری ہیں،خیبرپختونخوا کے سرحدی علاقوں میں تجارتی آمدورفت میں کسٹمز معاملات کو آسان بنایا جائے۔

انہوں نے کہا کہ صوبے میں سرمایہ کاری کے مواقع پیدا کرنے کےلئے تجارتی راستوں کو مکمل فعال بنانے کی ضرورت ہے، سرحدی علاقوں سے سمگلنگ کے خاتمے کےلئے ادارہ جاتی استعداد کو مزید بہتر بنایا جانا چاہیے۔