پشاور۔ 10 مئی (اے پی پی):گورنر خیبر پختونخوا فیصل کریم کنڈی نے ہفتہ کے روز انجمن ہلال احمر خیبر پختونخوا کے صوبائی ہیڈکوارٹر ڈبگری گارڈن پشاور کا دورہ کیا اور پشاور کے شہریوں کےلیے انجمن ہلال احمر خیبر پختونخوا کی جانب سے مفت ایمرجنسی ایمبولینس سروسز کا باضابطہ افتتاح کیا۔
افتتاحی تقریب میں چیئرمین انجمن ہلال احمر خیبر پختونخوا ملک حبیب اورکزئی، وائس چیئرمین فرزند وزیر، پیپلز پارٹی کے صوبائی ڈپٹی جنرل سیکرٹری ابرار سعید، سابق اسپیکر صوبائی اسمبلی کرامت اللہ چغرمٹی، رضاء اللہ خان چمکنی، ہلال احمر سوسائٹی کے اراکین اور دیگر متعلقہ حکام بھی موجود تھے۔گورنر خیبر پختونخوا نے موجودہ ملکی صورتحال میں فری ایمبولنس سروسز کے آغاز پرانجمن ہلال احمر کی پوری ٹیم کو مبارکباد پیش کی۔
اس موقع پر گورنر خیبر پختونخوا کو انجمن ہلال احمر کی مفت ایمبولینس سروس سے متعلق اجلاس میں تفصیلی بریفنگ دی گئی۔اجلاس میں بتایا گیا کہ انجمن ہلال احمر کی جانب سے شروع کی جانے والی مفت ایمبولینس سروس ابتدائی طور پر تین ایمبولینسوں پر مشتمل ہوگی جس کیلئے قلعہ بالا حصار، خیبر ٹیچنگ ہسپتال سمیت دیگر مقامات سے پشاور کے شہریوں کو یہ سروس فراہم کی جائے گی۔ اجلاس سے خطاب میں گورنر نے کہا کہ انجمن ہلال احمر مفت ایمبولینس سروس کا دائرہ کار جنوبی و شمالی اضلاع تک بڑھائے اور اس کیلئے ڈونرز سے رابطہ کر کے ایمبولینسز کی تعداد بھی بڑھائے جائے۔
انہوں نے کہا کہ یہ انجمن ہلال احمر کا طبی ایمرجنسی سہولیات میں ایک بہترین قابل قدر اقدام ہے، اس حوالہ سے شہریوں کو موثر آگاہی بھی فراہم کی جائے۔اس سروس کو نہ صرف ہم نے کامیاب بنانا ہے بلکہ دوسرے صوبوں کیلئے بھی قابل تقلید بنانا ہے۔انہوں نے اس موقع پر انجمن ہلال احمر کو صوبہ میں نرسنگ کالج کے قیام کیلئے بھی کام کرنے کی ہدایت کی اور کہا کہ اس حوالہ سے ڈونرز ممالک کے ساتھ جامع تجاویز کے ساتھ رابطہ کیا جائے۔
Short Link: https://urdu.app.com.pk/urdu/?p=595473
