پشاور۔ 30 اپریل (اے پی پی):گورنر خیبر پختونخوا فیصل کریم کنڈی کی زیرصدارت ایڈورڈز کالج پشاورکے 16ویں بورڈ آف گورنرز کا اجلاس بدھ کے روز گورنر ہاؤس میں منعقدہوا۔ اجلاس میں ایڈورڈز کالج کے مستقل پرنسپل کی تعیناتی سے متعلق سرچ کمیٹی نے اپنی سفارشات پیش کیں۔ سرچ کمیٹی کی سفارشات پر اراکین بورڈ آف گورنرز نے ایڈورڈز کالج پشاور کے مستقل پرنسپل تعیناتی کی منظوری دے دی۔ سرچ کمیٹی کی سفارشات پر بورڈ آف گورنرز اراکین کی جانب سے ڈاکٹر یعقوب بنگش کی بطور پرنسپل ایڈورڈز کالج تعیناتی کی منظوری دی گئی۔ اجلاس میں سرچ کمیٹی کی جانب سے مستقل پرنسپل کی تعیناتی کے طریقہ کار،شارٹ لسٹنگ، انٹرویو،مجموعی قابلیت معیار سے متعلق بریفنگ دی گئی۔اجلاس کو بتایا گیا کہ سرچ کمیٹی نے 15 امیدواروں میں سے 12 امیدواروں کا انٹرویو کیا جن میں سے مجموعی قابلیت کے مطابق 3 امیدواروں پر مشتمل پینل ترتیب دیا گیا۔
بورڈآف گورنرز اراکین نے تین امیدواروں کی پینل میں سے سرفہرست ٹاپ پوزیشن ہولڈر ڈاکٹر یعقوب بنگش کی بطور پرنسپل تعیناتی کی منظوری دی۔ گورنر خیبر پختونخوا فیصل کریم کنڈی نے سرچ کمیٹی کے اراکین کو طے کردہ طریقہ کار اور مقررہ وقت میں پرنسپل تعیناتی کا مرحلہ مکمل کرنے پر سراہا اور کہا کہ انتہائی افسوس تھا کہ عرصہ دراز سے ایڈورڈکالج مستقل پرنسپل تعیناتی سے محروم رہا۔ گورنر کا عہدہ سنبھالنے ہی عزم کیا تھا کہ ایڈورڈز کالج کا مستقل پرنسپل جلد از جلد تعینات کروں گا۔انہوں نے کہاکہ مستقل پرنسپل کی تعیناتی میں سنجیدہ کوششوں پر بورڈ اراکین اور سرچ کو کمیٹی کو مبارکباد پیش کرتا ہوں،عرصہ دراز سے مستقل پرنسپل کی عدم تعیناتی سے کالج کے تعلیمی،مالی و انتظامی معاملات شدید متاثر ہوئے، ایڈورڈز کالج نہ صرف خیبر پختونخوا میں بلکہ پاکستان میں ایک مقبول تاریخی تعلیمی درسگاہ کی حیثیت رکھتا ہے۔
اجلاس میں ایگزیکٹیو ڈائریکٹر غلام اسحاق خان انسٹیٹیوٹ شکیل درانی، امتیاز حسین گیلانی، ناصر علی خان، ڈاکٹر قبلہ ایاز، بشپ مانورمل شاہ،پروفیسر شجاعت علی، سارہ صفدر، محکمہ اعلی تعلیم، محکمہ خزانہ کے نمائندوں سمیت بورڈ کے دیگر اراکین شریک تھے۔
Short Link: https://urdu.app.com.pk/urdu/?p=590686
