کراچی۔ 14 مئی (اے پی پی):گورنر سندھ کامران خان ٹیسوری کی ہدایت پر گورنر ہاؤس میں یوم تشکر کی شاندار تقریب منعقد کی گئی۔بدھ کو جاری اعلامیہ کے مطابق تقریب میں مختلف مذاہب سے تعلق رکھنے والے افراد نے شرکت کی،تقریب میں مولانا بشیر فاروق نے ملک کی ترقی، خوشحالی، سلامتی اور استحکام کے لیے خصوصی دعائیں بھی کیں۔تقریب میں فضائیہ، نیوی اور بری فوج کے بینڈز نے سلامی پیش کی
جبکہ گورنر سندھ کے ہمراہ قومی اور صوبائی اسمبلی کے اراکین نے کیک کاٹ کر اس یادگار دن کو منایا۔ یوم تشکر کی تقریب میں شاندار آتش بازی کا مظاہرہ کیا گیا اور ملی نغمے پیش کیے گئے،جس سے حب الوطنی کا جذبہ مزید پروان چڑھا۔تقریب کے دوران مسیحی، ہندو، سکھ برادری سمیت دیگر افراد نے ہاتھوں کی زنجیر بناکر یکجہتی اور بھائی چارے کا بھرپور اظہار کیا۔پر رونق تقریب میں ہر طبقے سے تعلق رکھنے والے افراد نے بڑھ چڑھ کر حصہ لیا۔
Short Link: https://urdu.app.com.pk/urdu/?p=596983
