ریاض ۔21مئی (اے پی پی):گورنرمدینہ منورہ اور حج کمیٹی کے سربراہ شہزادہ سلمان بن سلطان بن عبدالعزیز نے حرمین ہائی سپیڈ ریلوے سٹیشن کا دورہ کیا اور حج سیزن کے حوالے سے فراہم کی جانے والی خدمات اور تیاریوں کا جائزہ لیا۔ایس پی اے کے مطابق گورنر مدینہ منورہ کی سٹیشن آمد کے موقع پر سعودی ریلوے سارکے سی ای او ڈاکٹر بشار بن خالد المالک نے خیرمقدم کیا۔
گورنرمدینہ منورہ شہزادہ سلمان بن سلطان کو حرمین ریلوے کے حج آپریشنل پلان کے بارے میں بتایا گیا۔رواں سال حج سیزن کے لیے مدینہ منورہ سے براستہ جدہ اور کنگ عبداللہ اکنامک سٹی کےلیے 4700 ٹرین سروسز شیڈول ہیں جن کے ذریعے 20 لاکھ سے زیادہ مسافروں کو سفری سہولیات فراہم کی جائیں گی۔
گورنرمدینہ اور ان کے ہمراہ وفد کے ارکان نے ریلوے سٹیشن کا دورہ کیا جن میں آمد و روانگی کے لاونج اور عازمین حج کے استقبال کاونٹرز شامل ہیں، اس موقع پر ای گیٹس کا بھی جائزہ لیا گیا ۔شہزادہ سلمان بن سلطان نے عازمین حج کو فراہم کی جانے والی خدمات کے معیار کو بہتر بنانے کی اہمیت پر بھی زور دیا۔
Short Link: https://urdu.app.com.pk/urdu/?p=599597
