لاہور/اسلام آباد۔8جنوری (اے پی پی):گورنر پنجاب انجینئر محمد بلیغ الرحمان نے وفاقی ٹیکس محتسب کے کوآرڈینیٹر مہر کاشف یونس کو پاکستان میں کرغزستان ٹریڈ ہائوس کا پہلا چیئرمین مقرر ہونے پر مبارکباد دی ہے۔ اتوار کو مہر کاشف یونس نے گورنر ہاو س میں ان سے ملاقات کی۔
ہر کاشف یونس نے اپنے ایک بیان مین کہا کہ گورنر پنجاب نے اس موقع پر کہا کہ کرغزستان ٹریڈ ہائوس کا حال ہی میں کرغزستان کے سفیر اولان بیک توتوئیف نے افتتاح کیا ہے۔ ٹریڈ ہائوس دوطرفہ تجارت کے فروغ، علاقائی رابطوں کے ذریعے تجارتی پوٹینشل سے بھر پور استفادہ اور دونوں ممالک کی تاجر برادری کے براہ راست رابطوں میں بھر پور مدد کرے گا جس کی موجودہ عالمی منظر نامے میں اشد ضرورت ہے۔
گورنر نے چیمبرز آف کامرس اینڈ انڈسٹری پر زور دیا کہ وہ آگے بڑھیں اور کرغزستان سمیت خطے کی دیگر ریاستوں کی مارکیٹ سے استفادہ کریں۔ انہوں نے کہا کہ مشکل زمینی رسائی دونوں ممالک اور خطے کے درمیان تجارتی و اقتصادی ہم آہنگی کی راہ میں بڑی رکاوٹ ہے اور افغانستان کے راستے ریلوے لنک کے قیام کے بعد یہ رکاوٹ دور ہو جائے گی۔ گورنر بلیغ الرحمان نے کہا کہ مہر کاشف یونس متحرک صنعت کار ہیں اور وہ دونوں برادر مسلم ممالک کے درمیان تجارت کو فروغ دینے کے لیے اپنا اثر و رسوخ استعمال کریں گے۔
اس موقع پر مہر کاشف یونس نے کہا کہ موجودہ حالات میں عالمگیریت کا فلسفہ آہستہ آہستہ ختم ہو رہا ہے اور علاقائی روابط میں تیزی آ رہی ہے، اس لیے اب ہمیں علاقائی بلاکس خاص طور پر امیر وسطی ایشیائی ریاستوں کے ساتھ تجارتی اور اقتصادی تعاون پر توجہ دینی چاہیے۔ ایک ہی خطے سے تعلق ہونے کی وجہ سے دونوں ممالک تاریخی، ثقافتی اور مذہبی طور پر گہرے رشتوں میں جڑے ہوئے ہیں۔ انہوں نے کہا کہ دوطرفہ تجارت کے حجم کو بڑھانے کے لیے ہرممکن کوششیں کی جائیں گی اور دونوں طرف کے درآمد و برآمد کنندگان کو تمام ممکنہ مواقع سے استفادہ کرنے اور وفود کے متواتر تبادلوں کے ذریعے نئے مواقع کی تلاش میں سہولت فراہم کی جائے گی۔ کاروباری برادری کو متوجہ کرنے اور تجارت کے حجم کو بڑھانے کے لیے ٹریڈ ہاس میں کرغستان کی مصنوعات کی نمائش کی جائے گی۔ انہوں نے کہا کہ سفیر کرغزستان اولان بیک توتوئیف پاکستانی تاجروں کو کرغزستان کے دوروں، بزنس ٹو بزنس میٹنگز اور تجارت کے لیے ہر ممکن مدد فراہم کرنے کیلئے ہمہ وقت دستیاب ہیں۔
