گورنر پنجاب سردار سلیم حیدر خان کی جعفرایکسپریس پر دہشت گردوں کے حملہ کی مذمت،سکیورٹی فورسز کو کامیاب آپریشن پر خراج تحسین

لاہور۔12مارچ (اے پی پی):گورنر پنجاب سردار سلیم حیدر خان نے جعفر ایکسپریس پر دہشت گردوں کے حملے کی پرزور الفاظ میں مذمت کی ہے۔انہوں نے سکیورٹی فورسز کو دہشت گردوں کے خلاف کامیاب آپریشن کرنے اور مسافروں کو بحفاظت بازیاب کرانے پر خراج تحسین پیش کیا۔ گورنر پنجاب نے کہا کہ معصوم شہریوں کو نشانہ بنانے والے سفاک درندے کسی طرح بھی انسان کہلانے کے حق دار نہیں۔

انہوں نے کہا کہ دہشت گردوں کے اس گھنائونے فعل کی جتنی بھی مذمت کی جائے کم ہے۔ گورنر پنجاب نے زخمیوں کی جلد صحتیابی کے لئے بھی دعا کی اور کہا کہ دہشت گرد اپنے مذموم مقاصد میں کبھی کامیاب نہیں ہوں گے۔ گورنر پنجاب نے کہا کہ پوری قوم دہشت گردوں کے خلاف اپنی سکیورٹی فورسز کے ساتھ سیسہ پلائی دیوار کی طرح کھڑی ہے۔

Short Link: https://urdu.app.com.pk/urdu/?p=571656