لاہور۔9دسمبر (اے پی پی):چانسلر/گورنر پنجاب محمد بلیغ الرحمن نے یہاں گورنر ہائوس لاہور میں موسمیاتی تبدیلی اور ماحولیات پر قائم کنسورشیم کے اجلاس کی صدارت کی۔ اجلاس میں سموگ کے مسئلہ کے حل کے لیے تجاویز اور اقدامات پر خصوصی بات چیت کی گئی۔
اجلاس میں چیئرمین پنجاب ہائر ایجوکیشن کمیشن ڈاکٹر شاہد منیر سمیت مختلف سرکاری جامعات کے وائس چانسلرز اور ماہرین نے شرکت کی۔ اس موقع پر کنسورشیم کے کنوینئر سابق وائس چانسلر اسلامیہ یونیورسٹی بہاولپور، پروفیسر ڈاکٹر اطہر محبوب اور واجد نسیم جتوئی نے گورنر پنجاب کو کنسورشیم میں پیش رفت پر تفصیلی بریفنگ دی ۔
اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ سموگ ماحولیات کے لیے بہت بڑا مسئلہ ہے جس کے انسانی صحت پر بہت مضراثرات ہیں۔انہوں نے کہا کہ غیرمعمولی حالات میں غیرمعمولی اقدامات لینے کی ضرورت ہے۔گورنر پنجاب نے کہا کہ جامعات ماحولیات پر کی گئی تحقیق اور ماہرین کے تجربات کی روشنی میں سموگ اور ماحولیاتی آلودگی کے مسئلہ کے حل میں کردار ادا کریں ۔
انہوں نے چیئرپرسن پنجاب ہائر ایجوکیشن کمیشن ڈاکٹر شاہد منیر کو ہداہت کی کہ اکیڈیمیاء اور انڈسٹری کے روابط کو مضبوط بنائیں۔گورنر پنجاب نے کہا کہ جامعات کے طلبا سوشل میڈیا پر ماحولیاتی آلودگی اور سموگ سے متعلق عوام میں آگہی پھیلانے کے لیے پیغامات کی تشہیر کریں۔
انہوں نے اس بات پر زور دیا کہ یونیورسٹیاں اپنے وسائل سے سموگ جیسے مسئلہ کے حل اور ماحولیات کو بہتر بنانے کے لیے اقدامات اٹھائیں۔گورنر پنجاب نے کہا کہ شارٹ ٹرم سلوشنز پر فوری کام شروع کیا جائے۔ گورنر پنجاب نے مختلف اسٹیک ہولڈرز بشمول سرکاری محکموں کو سموگ اور ماحولیاتی آلودگی پر قابو پانے کے لیے حتمی سفارشات تین دن کے اندر بھیجنے کی ہدایت بھی کی ۔
اجلاس میں پروفیسر ڈاکٹر واجد نسیم جتوئی، ڈائریکٹر، انٹرنیشنل سینٹر فار کلائمیٹ چینج، فوڈ سکیورٹی اینڈ سسٹین ایبلٹی، اسلامیہ یونیورسٹی آف بہاولپور کو موسمیاتی تبدیلی، ماحولیات پر قائم کنسورشیم کے لیے فوکل پرسن بھی نامزد کیا گیا۔اجلاس میں پروفیسر ڈاکٹر نوید اختر وائس چانسلر اسلامیہ یونیورسٹی بہاولپور ، پروفیسر ڈاکٹر شازیہ انجم اسلامیہ یونیورسٹی بہاولپور، پروفیسر ڈاکٹر واجد نسیم جتوئی, پروفیسر ڈاکٹر نسیم احمد، وائس چانسلر ،یونیورسٹی آف ویٹرنری اینڈ اینیمل سائنسز، پروفیسر ڈاکٹر احسن وحید راٹھور، وائس چانسلر- یو ایچ ایس؛ پروفیسر ڈاکٹر عارفہ طاہر (چیئرپرسن، شعبہ انوائرمنٹل سائنسز) ایل سی ڈبلیو یو؛ پروفیسر ڈاکٹر سید حبیب بخاری، وائس چانسلر ،کوہسار یونیورسٹی، مری؛ پروفیسر ڈاکٹر ایم سجاد خان، وائس چانسلر- چولستان یونیورسٹی آف ویٹرنری اینڈ اینیمل سائنسز، بہاولپور؛ پروفیسر ڈاکٹر شگفتہ ناز، وائس چانسلر، لاہور کالج فار ویمن یونیورسٹی، ڈاکٹر عزیر خان، یونیورسٹی آف لاہور اور ڈاکٹر علی حسین کاظم، یونیورسٹی آف انجینئرنگ اینڈ ٹیکنالوجی، لاہور شامل تھے۔
