لاہور۔26نومبر (اے پی پی):گور نر پنجاب چوہدری محمدسرور نے لاکھ غر یب بچوں کو سردیوں کے کپڑوں کی فراہمی کیلئے ”وینٹر اپیل “کے نام سے مہم کا آغاز کیا ہے ۔ گور نر ہاؤس کیفے ،قر آن گارڈن اور کورونا ہیروز وال کوروزانہ صبح11بجے سے شام6بجے تک فیملیز کیلئے کھولنے کا بھی اعلان کیا گیا ہے جبکہ میڈیا سے گفتگو کے دوران گور نر پنجاب چوہدری محمدسرور نے کہا کہ چوہدری برادران حکومت کیساتھ کھڑے ہیں ۔وزیراعظم کی ملاقات سے تمام غلط فہمیاں ختم ہوگئیں، ہم انکو ساتھ لیکر چلیں گے۔ آئین وقانون کے مطابق شہبا زشر یف اور حمزہ کو پیرول پر رہا کیا جائے گا۔تفصیلات کے مطابق گور نر پنجاب چوہدری محمدسرور نے گور نر ہائوس کیفے ،قر آن گارڈن اور کورونا ہیروز وال کو عوام کے لئے کھولنے کے افتتاح کے موقع پر سرور فاؤنڈیشن کی وائس چیئر پرسن بیگم پروین سرور کی زیر نگرانی میں شروع ہونیوالی ”وینٹر اپیل “ کا بھی گور نر ہاؤس میں جمعرات کے روز سے باقاعدہ آغاز کرد یا ہے اور بے سہارا بچوں میں جیکٹس اور سر دی سے بچاؤ کیلئے دیگر کپڑے بھی تقسیم کیے۔گور نر پنجاب چوہدری محمدسرور نے میڈیا کے سوالوں کے جوابات دیتے ہوئے کہا کہ حکومتی اتحادی ساتھ چل رہے ہیں،حکومتی اتحاد ٹوٹنے والا نہیں،مدت پوری کریں گے۔ انہوں نے کہا کہ وزیراعظم عمران خاں نے چودھری شجاعت حسین کی عیادت کی ہے، وزیراعظم کی ملاقات سے تمام غلط فہمیاں ختم ہوگئیں ہیں اور دونوں جماعتوں کے تعلقات پہلے سے زیادہ مضبوط ہوں گے۔ ایک سوال کے جواب میں چوہدری محمدسرور نے کہا کہ زندہ رہیں گے پھر ہی سیاست کر سکیں گے اس لیے اپوزیشن جماعتوں کو سب سے پہلے عوام کی جانوں کے تحفظ پر فوکس کر نا چاہیے۔ انہوں نے کہا کہ سب سے پہلے لوگوں کی جانیں قیمتی ہیں اسکے بعد سیاست۔ انہوں نے کہا کہ کورونا کی دوسری لہر پہلے سے زیادہ خطرناک ہے،احتیاط نہ کی تو انسانی جانوں کا زیادہ نقصان ہوگا اور معیشت بھی تباہ ہوگی۔گور نر پنجاب نے کہا کہ سیاسی جماعتوں کے ایک دوسرے کیساتھ اختلافات ضرور ہیں مگربھارت کشمیر میں جو ظلم اور بربریت کررہا ہے اسکے خلاف سب پارٹیاں بھارت کیخلاف چٹان کی طرح کھڑی ہیں اور ہم دنیا میں بھارت کو ایکسپوز کررہے ہیں ۔چوہدری محمدسرور نے کہا کہ گور نر ہاﺅس کیفے ،قر آن گارڈن اور کورونا ہیروز وال کو فیملیز کیلئے کھول دیا ہے جہاں عوا م کو کھانے پینے کی سستی اشیاءاور بیٹھنے کیلئے بہتر ین سہولیات بھی فراہم کی جا رہی ہیں۔ انہوں نے کہا کہ یہاں پر سیکورٹی سمیت تمام حفاظتی اقدامات کو یقینی بنایا جائے گا۔ انہوں نے کہا کہ مجھے خوشی ہے کہ کہ آج کے دن مَیں ”وینٹر اپیل“کا بھی آغاز کر رہاہوں اِنشاءاللہ ہم پنجاب بھر میں غر یب بچوں کو سردیوں کے کپڑے فراہم کر یں گے ۔گور نر پنجاب کی اہلیہ بیگم پروین سرور نے کہا کہ سرورفاﺅنڈیشن نے جمعرات کے روز یہاں آنیوالے غریب بچوں کو سردیوں کیلئے کپڑے فراہم کیے ہیں اسکے بعد ہم پنجاب کے دیگر شہروں تک بھی جائیں گے اور پہلے مر حلے میں ہم نے1لاکھ غر یب بچوں کوسردیو ں کیلئے جیکٹس اور دیگر کپڑے فراہم کر نے کا ٹارگٹ رکھا ہے اور آنیوالے دنوں میں اس میں مزید اضافہ کیا جائیگا۔ انہوں نے کہا کہ ہماری کوشش ہے کہ پنجاب میں جہاں بھی غر یب بچوں کو ایسے کپڑوں کی ضرورت ہے انکو فراہم کریں۔ انہوں نے کہا کہ ہم مخیرحضرات سے بھی کہنا چاہتے ہیں کہ وہ وہ اس ”وینٹر اپیل “میں زیادہ سے زیادہ حصہ لیں۔
