اسلام آباد۔13مئی (اے پی پی):وزیراعظم کے خصوصی معاون ہارون اختر خان اور روس کے نمائندے ڈینس نازروف نے منگل کو ملاقات کی ۔ ملاقات میں دوطرفہ تعاون سمیت پاکستان میں نئی سٹیل ملز کے قیام کے حوالے سے تبادلہ خیال کیا گیا ۔دونوں فریقین نے پاکستان اور روس کے درمیان کراچی میں نئی سٹیل مل کے قیام کے حوالے سے تفصیلی بات چیت کی۔
دونوں ممالک نے اس منصوبے کو آگے بڑھانے اور اس پر عمل درآمد کے لیے مشترکہ ورکنگ گروپ تشکیل دینے پر اتفاق کیا۔ملاقات کے دوران ہارون اختر خان نے وزیراعظم شہباز شریف کے وژن کو اجاگر کیا جس کا مقصد پاکستان میں سرمایہ کاری کو فروغ دینا ہے۔ انہوں نے کہا کہ یہ وقت غیر ملکی سرمایہ کاروں کے لیے پاکستان میں سرمایہ کاری کرنے کے لیے بہترین موقع ہے اور پاکستان نے بین الاقوامی سطح پر خود کو ایک محفوظ اور مستحکم سرمایہ کاری کی منزل کے طور پر پیش کیا ہے۔
مزید برآں ہارون اختر خان نے پاکستان اور روس کے درمیان سٹیل کی صنعت میں شاندار تعاون کے امکانات پر روشنی ڈالی جس سے دونوں ممالک کو فائدہ پہنچ سکتا ہے۔ انہوں نے کہا کہ پاکستان ایک محفوظ اور ترقی پزیر سرمایہ کاری کا مرکز ہے اور عالمی برادری نے اس کی صلاحیت کو تسلیم کیا ہے۔ ہارون اختر خان نے کہاکہ انہوں نے روس کے تمام کاروباری افراد کو پاکستان میں سرمایہ کاری کے مواقع تلاش کرنے کی دعوت بھی دی۔ اس ملاقات نے دونوں ممالک کے درمیان تعلقات کو مزید مستحکم کرنے میں ایک اہم قدم اٹھایا ہے اور سٹیل کی پیداوار جیسے اہم شعبوں میں مشترکہ منصوبوں کے لیے نئی راہیں کھولی ہیں۔
Short Link: https://urdu.app.com.pk/urdu/?p=596565
