کوئٹہ۔ 21 دسمبر (اے پی پی):نگران وزیر اعلٰی بلوچستان میر علی مردان خان ڈومکی نے گزشتہ روز ہتھیار ڈالنے والے مزاحمت کاروں کو قومی دھارے میں شامل ہونے پر خوش آمدید کہتے ہوئے رواں ماہ کوئٹہ میں منعقد ہونے والے قبائلی جرگے کے عمائدین کی عملی کاوشوں کو سراہا اور کہا کہ قبائلی جرگے کے مثبت اثرات آنا شروع ہوگئے ہیں ۔
یہاں جاری ایک بیان میں وزیر اعلٰی نے کہا کہ ہم نے کھلے دل سے تمام ناراض بلوچوں کو قومی دھارے میں شامل ہوکر ملکی تعمیر و ترقی میں کردار ادا کرنے کی دعوت دی ہے ،ہمارے دروازے بات چیت کے لیے کھلے ہیں ۔ انہوں نے کہا کہ گزشتہ روز 70 ریاست مخالف افراد قومی دھارے میں شامل ہوئے امید ہے مزید لوگ بھی آئیں گے، ریاست عظیم ماں اور شفیق باپ کی مانند ہے ۔انہوں نے کہا کہ ریاست مخالف تحریکوں میں کچھ نہیں رکھا ، مسائل کا حل باہمی بات چیت سے ہی ممکن ہے ، صوبے کے بنیادی مسائل کے حل کےلئے مل بیٹھ کر راہیں نکالنی ہیں ۔
وزیر اعلٰی نے کہا کہ بلوچستان ہم سب کی سرزمین ہے جس کی ترقی کے لئے ہم نے اجتماعی سوچ کو پروان چڑھانا ہے اور یہاں کے باسیوں کو درپیش مسائل کے حل کےلئے ذاتی مفادات کو ایک طرف رکھ کر اجتماعی ترقی کے لیے کام کرنا ہے۔
