ہر شہر میں اینڈ ٹو اینڈٹرانسپورٹ سسٹم لانا چاہتے ہیں، آٹو میٹڈ ریپڈ ٹرانسپورٹ سسٹم چھوٹے شہر میں رہنے والوں کا بھی حق ہے۔ مریم نواز

لاہور۔27فروری (اے پی پی):وزیراعلی پنجاب مریم نواز نے پنجاب میں پانچ سالہ ٹرانسپورٹ پلان کی منظوری دے دی ہے۔ وزیراعلی کی زیر صدارت ٹرانسپورٹ سے متعلق خصوصی ویڈیولنک اجلاس منعقد ہوا جس میں صوبے بھر میں نیا جدید ٹرانسپورٹ سسٹم کے بارے میں جائزہ لیا گیا۔

اجلاس میں پنجاب بھر جدیدترین آٹو میٹڈ ریپڈ ٹرانسپورٹ سسٹم متعارف کرانے کا فیصلہ کیا گیا۔ مریم نواز نے اے آر ٹی کے فوری ٹرائل رن کا حکم دے دیا۔ وزیراعلی کو بریفنگ میں بتایا گیا کہ آٹو میٹڈ ریپڈ ٹرانسپورٹ سسٹم ملایشیا، ابوظہبی اور قطر سمیت دنیا بھر میں ماس ٹرانزٹ کا کامیاب سسٹم ہے۔ عام بس کی نسبت اے آر ٹی کے لئے روڈ پر کم جگہ درکارہوگی۔

اے آرٹی تین کوچز پر مشتمل بس میں 300سے زائد مسافر وں کی گنجائش ہوگی۔ بریفنگ میں مزید بتایا گیا کہ اے آر ٹی سمارٹ اسٹیشن پر بس کھڑے کھڑے چند منٹ میں چارج ہوجائے گی۔ اے آر ٹی میں مسافروں کے لئے فارسٹ چارجنگ، وائی، مانیٹرنگ کیمرے اور دیگر سہولیات میسر ہونگی۔ اے آر ٹی روایتی فیول کی بجائے مکمل سولرائزڈ ٹرانسپورٹ سسٹم ہوگا۔ پہلے مرحلے میں لاہور، فیصل آباد اور گوجرانوالہ سمیت دیگر شہروں میں اے آر ٹی ٹرانسپورٹ سسٹم متعارف کرایا جائے گا۔ بریفنگ میں بتایا گیا کہ تین مراحل میں دس دس شہروں میں نیا ٹرانسپورٹ سسٹم متعارف کرایا جائے گا۔

آٹو میٹڈ ریپڈ ٹرانسپورٹ سسٹم کے ساتھ ہر شہر میں فیڈر بسیں بھی چلائی جائیں گی۔انہوں نے اجلاس میں گفتگو کرتے ہوئے کہا کہ آٹو میٹڈ ریپڈ ٹرانسپورٹ پنجاب بھر میں چار سال میں مکمل کرنا چاہتے ہیں۔جدت کا ٹچ دینے کے لئے ہر شہر میں نیا ٹرانسپورٹ سسٹم ضروری ہے۔ ہر شہر میں اینڈ ٹو اینڈسسٹم متعارف کرانے چاہتے ہیں۔ آٹو میٹڈ ریپڈ ٹرانسپورٹ سسٹم چھوٹے شہر میں رہنے والوں کا بھی حق ہے محرومیاں دور کرنا چاہتے ہیں۔جدید ٹرانسپورٹ سسٹم سے لوگوں کے معیار زندگی میں بہتری آئے گی۔

Short Link: https://urdu.app.com.pk/urdu/?p=567151