مظفر آباد۔ 15 مئی (اے پی پی):صدر آزاد جموں و کشمیر بیرسٹر سلطان محمود چوہدری نے کہا ہے کہ یومِ تشکر کے اس تاریخی دن کے موقع پر میں پوری پاکستانی قوم، بالخصوص آزاد کشمیر کے عوام کو مبارکباد پیش کرتا ہوں۔ "آپریشن بنیان المرصوص” نہ صرف ایک عسکری کامیابی ہے بلکہ یہ ہماری قومی حمیت، خودداری، اور قربانی کے جذبے کی عملی تصویر ہے۔
جمعرات کے روز ایک بیان میں انہوں نے کہا کہ جب دشمن نے رات کی تاریکی میں میزائل حملوں کے ذریعہ پاکستان کی خودمختاری کو چیلنج کیا، تب ہماری افواج نے برق رفتاری سے جواب دے کر دشمن کو وہ سبق سکھایا جو تاریخ میں سنہری حروف سے لکھا جائے گا۔ بھارت کو نہ صرف فوری جنگ بندی پر مجبور ہونا پڑا بلکہ عالمی سطح پر بھی پاکستان کی دفاعی صلاحیت، حکمتِ عملی اور عزم کو سراہا گیا۔
یہ کامیابی ہمیں یاد دلاتی ہے کہ افواجِ پاکستان نہ صرف جغرافیائی سرحدوں کی محافظ ہیں، بلکہ یہ قومی وقار اور امتِ مسلمہ کی امیدوں کا مرکز بھی ہیں۔ آج ہم اُن شہداء کو بھی خراجِ عقیدت پیش کرتے ہیں جنہوں نے اس آپریشن میں اپنی جانیں قربان کر کے ہمیں یہ دن نصیب کیا۔ ہم اُن معصوم شہریوں اور بچوں کو بھی نہیں بھول سکتے جو بھارتی جارحیت کی بھینٹ چڑھے۔
16 مئی کو منعقد ہونے والی یومِ تشکر تقریبات میں ہر فرد، ہر ادارہ اور ہر طبقہ بھرپور شرکت کرے۔ نماز جمعہ کے بعد ریلیوں میں شامل ہو کر افواج پاکستان کے ساتھ اپنی یکجہتی کا اظہار کریں اور اللہ تعالیٰ سے دعا کریں کہ وہ مقبوضہ جموں و کشمیر کو جلد آزادی کی نعمت سے نوازے۔
Short Link: https://urdu.app.com.pk/urdu/?p=597398
