ہماری فضائیہ نے جس طرح بھارت کے بزدلانہ حملے کا جواب دیا اس پر ہم سلام پیش کرتے ہیں، اگر بھارت یہ سمجھتا ہے کہ اس کے حملوں کے جواب میں ہم خاموش رہیں گے تو یہ اس کی بھول ہے، بلاول بھٹو زرداری

اسلام آباد۔7مئی (اے پی پی):پاکستان پیپلز پارٹی کے چیئرمین بلاول بھٹو زرداری نے کہا ہے کہ ہماری فضائیہ نے جس طرح بھارت کے بزدلانہ حملے کا جواب دیا ہے، اس پر ہم سلام پیش کرتے ہیں، اگر بھارت پھر حملے کرے گا توہم پھر اس کے جہاز گرائیں گے جیسے کہ گزشتہ شب مچھروں کی طرح اس کے جہاز گرائے گئے ، اگر بھارت یہ سمجھتا ہے کہ اس کے حملوں کے جواب میں ہم خاموش رہیں گے تو یہ اس کی بھول ہے۔

بدھ کوقومی اسمبلی کے اجلاس میں اظہارخیال کرتے ہوئے بلاول بھٹو زرداری نے کہا کہ بزدل رات کے اندھیرے میں حملے کرتے ہیں، اگر ان میں ہمت ہوتی تو وہ دن میں آکر اعلان جنگ کرتے اور ہمارے سپاہیوں کا سامنا کرتے، انہوں نے رات کے اندھیرے میں بچوں کو نشانہ بنایا جس کی ہم اور پوری دنیا مذمت کرتی ہے۔ انہوں نے کہا کہ یہ 2003ء نہیں ہے کہ کوئی ملک اٹھ کر کہے کہ مسلمان دہشت گرد ہیں اور پوری دنیا مان لے، د و ہفتے سے بھارت الزامات لگا رہا ہے،

اس کے جواب میں وزیراعظم نے الزامات کو مسترد کرتے ہوئے کہا کہ ہمارے ہاتھ صاف ہیں، اسی لیے پہلگام واقعے کی بین الاقومی سطح کی تحقیقات کی پیشکش کی کہ اس حملے میں کون ملوث ہے۔چیئرمین پیپلزپارٹی نے کہا کہ دہشت گردی بزدلی کی ایک شکل ہے اور نہ ہی پاکستان اور نہ ہی کشمیری اس میں ملوث ہیں، دوسری جانب بھارت جھوٹ بول رہا ہے اور ہم اس کا چہرہ دنیا کے سامنے بے نقاب کریں گے۔انہوں نے کہا کہ بھارت ایک بڑا ملک ہونے کے زعم میں وحشی بن چکا ہے، مگر پاکستان کے بہادر اور غیور عوام اس کی آنکھیں کھول دیں گے، ہم جنگ کے حامی نہیں ہیں اور نہ کبھی جنگ کے حامی رہے ہیں مگر اب بھارت نے پاکستان کے بے گناہ شہریوں پر حملہ کیا ہے تو اب وہ ہمارے جواب کا انتظار کرے۔

بلاول بھٹو نے کہا کہ انٹرنیشنل چارٹر اور اقوام متحدہ کے مطابق پاکستان کو یہ حق حاصل ہے کہ وہ جب اور جس انداز سے چاہے اس حملے کا جواب دے، ہم اور عوام حکومت اور افواج پاکستان کے ساتھ ہیں۔انہوں نے کہا کہ وزیراعظم نے بھارت کو (پہلگام واقعے کی) شفاف اور غیرجانبدارانہ تحقیقات کی پیشکش کی تھی جس کا بھارت نے جواب نہیں دیا۔بلاول بھٹو زرداری نے کہا کہ پاکستان میدان جنگ میں اور سفارتی سطح پر ہر حملے کا جواب دینے کی پوری صلاحیت رکھتا ہے، اگر بھارت یہ سمجھتا ہے کہ اس کے حملوں کے جواب میں ہم خاموش رہیں گے تو یہ اس کی بھول ہے۔

Short Link: https://urdu.app.com.pk/urdu/?p=593954