دمشق۔29مارچ (اے پی پی):شام کے صدر احمد الشرع نے کہا ہے کہ ان کے ملک کو اپنی جنوبی سرحدوں پر بڑے سکیورٹی چیلنجز کا سامنا ہے۔ العربیہ اردو کے مطابق انہوں نے ایوانِ صدر سے شائع ہونے والے بیان میں کہا کہ اسرائیل کی اپنے علاقوں میں موجودگی علاقائی امن و سلامتی کے لیے مسلسل خطرے کی نمائندگی کرتی ہے۔شامی ایوان صدر نے یہ بھی واضح کیا کہ فرانس نے زوم کے ذریعے ایک سربراہی اجلاس کی میزبانی کی جس میں شام کے صدر احمد الشرع ، فرانسیسی صدر ایمانوئل میکرون، لبنان کے صدر جوزف عون، قبرص کے صدر نیکوس کرسٹو ڈی لیڈس اور یونانی وزیر اعظم کیریاکوس میتسوتاکس شامل تھے۔
اس سربراہی اجلاس میں مشرق وسطیٰ کے خطے میں سلامتی اور استحکام کو متاثر کرنے والے علاقائی و بین الاقوامی مسائل کے ایک گروپ پر اہم بات چیت ہوئی اور کئی ایسے حساس موضوعات پر بات کی گئی جو پانچ ممالک کے درمیان تعلقات کو متاثر کرتے ہیں۔یاد رہے جنوبی شام میں درعا گورنری کے ایک قصبے پر اسرائیلی بمباری سے کم از کم پانچ افراد ہلاک ہو گئے تھے۔ علاقے کے حکام نےاطلاع دی تھی کہ اس علاقے میں اسرائیلی دراندازی اور وہاں سے مکینوں کی نقل مکانی کا اشارہ مل رہا ہے۔
Short Link: https://urdu.app.com.pk/urdu/?p=577131
