کراچی۔25فروری (اے پی پی):کوئٹہ گلیڈی ایٹرز کے بولنگ کوچ عمر گل نے کہا ہے کہ ہم پی ایس ایل میں اب تک اچھی کرکٹ نہیں کھیل سکے، ہمیں کھیل کے تینوں ڈپارٹمنٹس میں بہتری لانا ہوگی۔ ان خیالات کا اظہار انہوں نے گذشتہ شب پاکستان سپر لیگ (پی ایس ایل) سیزن 8 کے تیرھویں میچ میں اسلام آباد یونائیٹڈ سے شکست کے بعد پریس کانفرنس کرتے ہوئے کیا۔
انہوں نے اپنی ٹیم کی پرفارمنس پر دکھ کا اظہارکرتے ہوئے کہا کہ ابھی ہم ٹورنامنٹ سے باہر نہیں ہوئے اور موقع ہے کہ ہم کم بیک کرسکتے ہیں۔ انہوں نے کہا کہ گلیڈی ایٹرز کی ٹیم وقفہ وقفہ سے کچھ بہترکھیلتی ہے مگر فنش اچھا نہیں کرپارہے ،جو پلان کیا تھا اس کے مطابق بولنگ نہیں ہوسکی،بولرز کو اے بی سی سارے پلان دئیے تھے۔ انہوں نے اعظم خان کی اچھی بیٹنگ کی تعریف کرتے ہوئے کہا کہ اعظم خان کی بیٹنگ نے آج بہت فرق ڈالا ہے،اعظم خان نے جس طرح یٹنگ کی میچ کو ون سائیڈڈ بنادیا۔
انہوں نے کہا کہ معین خان بطور پروفیشنل کوچ مایوس ہوں گے مگر بطور والد اعظم کی پرفارمنس سے ضرور خوش ہوئے ہوں گے۔ عمر گل نے کہا کہ فیلڈنگ میں ہم بہتر کرسکتے تھے، ہم اچھے کامبی نیشن کی تلاش میں ہیں تاہم ہم اچھا نہیں کھیل پارہے ہیں۔ انہوں نے کہا کہ ہمیں توقع تھی کہ ہسارنگا آئے گا ، اس کے حساب سے کامبی نیشن بنایا تھا،جب اہم پلیئر سے محروم ہوجاتے ہیں تو کامبی نیشن بنانا مشکل ہوجاتا ہے۔
انہوں نے کہا کہ ایمل خان ٹیلنٹیڈ کھلاڑی ہے،ٹیم کو یہی کہا ہے کہ پانچ میچ باقی ہیں، اب بھی بہتر ہوسکتا ہے۔ عمر گل نے کہا کہ کراچی اور کوئٹہ نے جن پلیئرز کو ریلیز کیا، انہوں نے ہمارے خلاف ہی پرفارم کردیا،رائیلی روسو کو ریلیز کیا اس نے پرفارم کردیا، اعظم کو ریلیز کیا اس نے پرفارم کیا۔
