کوئٹہ۔ 26 مارچ (اے پی پی):وزیر اعلیٰ بلوچستان میر سرفراز بگٹی سے سینیٹر دنیش کمار کی قیادت میں ہنگلاج ماتا مندر کے مکھیا کی وفد کے ہمراہ ملاقات کی۔ ملاقات میں سابق وزیر اعظم انور الحق کاکڑ بھی موجود تھے ۔
وفد نے ہنگاج ماتا مندر میں ترقیاتی منصوبوں پر وزیر اعلیٰ بلوچستان کا شکریہ ادا کیا ۔وفد سے گفتگو کرتے ہوئے وزیر اعلیٰ بلوچستان میر سرفراز بگٹی نے ہنگلاج ماتا مندر کو ریلیجئس ٹورسٹ سائٹ بنانے کا عزم کرتے ہوئے آئندہ مالی سال کے صوبائی بجٹ میں مزید وسائل مختص کرنے کی یقین دہانی کرائی، میر سرفراز بگٹی نے کہا کہ بلوچستان میں اقلیتوں کو خود سے الگ نہیں ،اکثریت کا حصہ سمجھتے ہیں ،اقلیتوں کی فلاح و بہبود کیلئے سینیٹر دنیش کمار کا متحرک کردار نمایاں اہمیت کا حامل ہے ،انہوں نے ہمیشہ اقلیتوں کی سماجی بہبود کے لئے بے لوث خدمات سر انجام دی ہیں ۔
وزیر اعلٰی بلوچستان نے کہا کہ اقلیتوں کو تعلیم، صحت، روزگار اور ترقی کے یکساں مواقع فراہم کررہے ہیں ،بینظیر بھٹو سکالرشپ پروگرام میں اقلیتوں کے لئے غیر معمولی کوٹہ مختص کیا گیا ہے ،اقلیتوں کو اعلیٰ تعلیم کے اس پروگرام میں بھرپور حصہ لینا چاہئے
،انہوں نے کہا کہ بلوچستان میں مذہبی رواداری اور بین المذاہب ہم آہنگی پائی جاتی ہے ،انہوں نے کہا کہ ہنگلاج ماتا مندر میں ہر سال لاکھوں یاتری آتے ہیں اس لئے یہ مقام ایک عالمی معیار کےمذہبی ٹورسٹ سائٹ کے طور پر متعارف ہوسکتا ہے ،یاتریوں کو تمام تر سہولیات کی فراہمی کے لئے درکار وسائل فراہم کرتے رہیں گے ،وزیر اعلٰی نے کہا کہ پاکستان کی معاشی و سماجی ترقی میں اقلیتوں کے کردار کو فراموش نہیں کیا جا سکتا۔
Short Link: https://urdu.app.com.pk/urdu/?p=576554
