کراچی۔ 18 فروری (اے پی پی):پاکستان سپر لیگ(پی ایس ایل) کی فرنچائز کراچی کنگز کے کپتان شان مسعود نے پہلی بار اپنے ہوم سٹی فرنچائز کے لیے ایچ بی ایل پی ایس ایل 9میں شرکت پر گرمجوشی کا اظہار کرتے ہوئے کہا ہے کہ کراچی کنگز کا اسکواڈ تجربہ کار اور نوجوان کھلاڑیوں کا بہترین امتزاج ہے۔ اتوار کو یہاں جاری تفصیلات کے مطابق انہوں نے کراچی کنگز کے افتتاحی میچ سے قبل پریس کانفرنس میں کہا کہ ہمارے پاس شعیب ملک، حسن علی اور کیرون پولارڈ جیسے مقامی اور غیر ملکی کھلاڑی ہیں، اس کے علاوہ ہمارے پاس نوجوان کھلاڑیوں کا اچھا گروپ بھی ہے جو متوازن پہلو بناتا ہے۔
انہوں نے پاکستان انڈر 19کے کپتان سعد بیگ اور عرفات منہاس کی بھی تعریف کرتے ہوئے اس امید کا اظہار کیا کہ وہ آنے والے سالوں میں کراچی کنگز کے لیے اہم کرکٹر ثابت ہوں گے۔ انہوں نے کہا کہ رواں سیزن میں ٹیم کے اہداف میں ہوم کرائوڈ کے سامنے ٹرافی جیتنا ہے۔شان مسعود نے کہا کہ ہم اپنی بھرپور صلاحیتوں کے مطابق کھیلنے کی کوشش کریں گے اور کرکٹ کے اپنے برانڈ کے ساتھ کراچی کنگز کے لیے ایک نئی شناخت بنائیں گے، ہمارا مقصد کراچی میں اپنے ہوم گرائونڈ پر مقامی شائقین کے سامنے پلے آف اور فائنل جیتنا ہے۔
