پشاور۔ 21 فروری (اے پی پی):یونیورسٹی آف انجینئرنگ اینڈ ٹیکنالوجی پشاور کا کانووکیشن منعقد کیا گیا ۔وزیر اعلی ہاوس پشاور حکام کی جانب سے جاری بیان کے مطابق تقریب میں وزیر اعلیٰ خیبر پختونخوا علی امین خان گنڈاپور نے بحیثیت چانسلر شرکت کی۔تقریب میں صوبائی وزیر برائے اعلیٰ تعلیم مینا خان آفریدی ، یونیورسٹی انتظامیہ و فیکلٹی ، گریجویٹس اور ان کے والدین بھی شریک تھے۔
تقریب میں وزیر اعلیٰ نے مجموعی طور پر 555 طلبا بیچلر، ماسٹر اور پی ایچ ڈی ڈگریوں سےنوازا۔نمایاں پوزیشن حاصل کرنے والے 23 گریجویٹس کو گولڈ میڈلز سے بھی نوازا گیا ۔وزیر اعلیٰ نے کانووکیشن سے خطاب کرتے ہوئے کہا کہ گریجویشن مکمل کرنے والے طلبہ، ان کے والدین اور فیکلٹی ممبران کو مبارکباد پیش کرتا ہوں، دعا گو ہوں گریجویٹس جس فیلڈ میں جائیں وہ محنت کریں اور ملک و صوبے کا نام روشن کریں ۔
انہوں نے کہا کہ مجھے اس بات پر فخر ہے کہ یو ای ٹی پشاور صرف صوبے کا نہیں بلکہ پورے ملک کا ایک قابل فخر ادارہ ہے، اس ادارے نے انجینئرنگ و ٹیکنالوجی کے شعبوں میں بڑے بڑے نام پیدا کئے ہیں۔انہوں نے کہا کہ مجھے اس بات پر بھی خوشی ہے کہ یو ای ٹی وقت کی ضروریات کے مطابق چل رہی ہے اور نئے پروگرامز متعارف کرا رہی ہے ،گریجویٹس ریسرچ اور ٹیکنالوجی میں آگے بڑھیں، ان شعبوں میں وسیع مواقع موجود ہیں۔
انہوں نے کہا کہ ہم نے طلبہ کے لیے سکالرشپس فنڈ بڑھا دیا، طلبہ کو بیرون ممالک تعلیم حاصل کرنے کے مواقع دیئے جا رہے ہیں، صوبے میں طالبات کی تعلیم بالکل مفت کرنے جا رہے ہیں کیونکہ ایک پڑھی لکھی ماں ہی پڑھے لکھے معاشرے کی تشکیل کرتی ہے۔
انہوں نے کہا کہ ہم اداروں کو اپنے پاؤں پر کھڑا کرنے پر کام کر رہے ہیں ،ہم ایسا نظام بنا رہے ہیں جس میں یونیورسٹیوں کو تنخواہ و پینشن کی ادائیگی کا مسئلہ ختم ہو جائے گا ، بہت جلد یونیورسٹیاں بحران سے نکل کر خود کفیل ہو جائیں گی ۔انہوں نے کہا کہ ہم نے ایک عظیم قوم بننے کے لئے پہلے خود کو عظیم بنانا ہوگا، اسلامی تعلیمات پر عمل کئے بغیر عظمت و ترقی ممکن نہیں۔
انہوں نے کہا کہ گریجویٹس کے لئے روزگار کے مواقع پیدا کرنے کے لئے صنعتی شعبے کے فروغ پر کام کر رہے ہیں، آئندہ بجٹ میں ڈاکٹرز و انجنیئرز کے لئے بھی لون سکیم شروع کرنے جا رہے ہیں تاکہ گریجویٹس خود نوکریاں ڈھونڈنے کی بجائے لوگوں کے لئے نوکریاں پیدا کر سکیں ۔
Short Link: https://urdu.app.com.pk/urdu/?p=564479
