یونیورسٹی آف سرگودھا میں انسٹی ٹیوٹ آف آرٹ اینڈ ڈیزائن کے زیرِ اہتمام ایک روزہ”تھیسس ڈسپلے” نمائش کا انعقاد

سرگودہا۔13جون (اے پی پی):یونیورسٹی آف سرگودھا میں انسٹی ٹیوٹ آف آرٹ اینڈ ڈیزائن کے زیرِ اہتمام زبیدہ آغا آرٹ گیلری میں ایک روزہ تھیسس ڈسپلے نمائش کا انعقاد کیاگیا۔نمائش کا افتتاح وائس چانسلر ایمرسن یونیورسٹی ملتان پروفیسر ڈاکٹر محمد رمضان نے وائس چانسلرجامعہ سرگودہاپروفیسر ڈاکٹر قیصر عباس اور پرو وائس چانسلرجامعہ سرگودہا پروفیسر ڈاکٹر میاں غلام یاسین کے ہمراہ کیا۔

وائس چانسلرپروفیسر ڈاکٹر قیصر عباس نے نمائش کو سراہا۔ اُنہوں نے کہا کہ نمائش میں موجود فن پاروں کا تنوع اور معیار متاثر کن ہے۔ یہ واضح ہے کہ یہ طلباء نہ صرف ہنر مند ہیں بلکہ اپنے فن کے بارے میں پرجوش بھی ہیں، یہ نمائش ہمارے طلباء اور فیکلٹی کی صلاحیتوں اور لگن کا منہ بولتا ثبوت ہے۔پروفیسر ڈاکٹر محمد رمضان نے طلباء کی شاندار کاوشوں اور تخلیقی صلاحیتوں کو سراہا۔ اُنہوں نے معاشرے میں فن کی اہمیت پر زور دیا اور نوجوان فنکاروں کی حوصلہ افزائی کی کہ وہ لگن کے ساتھ اپنے شوق کو جاری رکھیں۔

انہوں نے مزید کہا کہ ہر آرٹ ورک ایک منفرد کہانی بیان کرتا ہے،جو طلباء کے متنوع تناظر اور تجربات کی عکاسی کرتا ہے۔ٹیکسٹائل، فائن آرٹس، انٹیریئر ڈیزائن اور گرافک ڈیزائن پر 170 سے زائد مقالے پیش کیے گئے۔ اس تقریب نے اُبھرتے ہوئے فنکاروں کو اپنی صلاحیتوں اور تخلیقی صلاحیتوں کو ظاہر کرنے کے لیے ایک پلیٹ فارم فراہم کیا۔