اسلام آباد۔3جون (اے پی پی):پاکستان کی سترہ یونیورسٹی طالبات قطر میں فیوچر آف ویمن اِن انرجی اسکالرز پروگرام میں شرکت کریں گی۔یو ایس پاکستان ویمن کونسل (یو ایس پی ڈبلیو سی) کی جانب سے چار ہفتوں کے دورانیہ پرمبنی فیوچر آف ویمن اِن انرجی اسکالرز پروگرام کا آغاز اتوار کو ہوگا۔ پاکستان میں امریکی سفارت خانے کی جانب سے جمعہ کو جاری بیان کے مطابق اس پروگرام کے تحت 5 جون سے 17 ہونہار پاکستانی طالبات توانائی کے شعبہ میں کام سیکھنے سے متعلق ایک سرٹیفکیٹ پروگرام میں شرکت کریں گی۔
یہ پروگرام نوجوان خواتین کو ٹیکساس اے اینڈ ایم یونیورسٹی کے قطر میں قائم کیمپس میں توانائی کےاموراوربنیادی ڈھانچہ کے بارے میں تعلیم حاصل کرنے کے مواقع فراہم کرتے ہوئے پاکستان کے توانائی کے شعبہ میں خواتین کی شرکت اورسربراہی کو فروغ دے گا۔ قطر میں پروگرام میں شرکت کے بعد یہ طالبات پاکستان واپس پہنچ کراسلام آباداورلاہورمیں اہم سرکاری اور نجی اداروں کے ساتھ مشغول ہو کرخودکو پاکستان میں توانائی کے شعبہ سے مانوس اور اس کے بارے میں معلومات حاصل کریں گی۔
بیان کے مطابق اس پروگرام کی اعانت پاکستان میں امریکی مشن، امریکی محکمہ خارجہ، امریکی محکمہ توانائی، امریکی ادارہ برائے بین الاقوامی ترقی( یو ایس ایڈ) ،ٹیکساس اے اینڈ ایم یونیورسٹی اورتوانائی کے شعبہ میں خواتین کی ترقی کے فروغ میں دلچسپی رکھنے والے متعدد سرکاری اور نجی آجر اداروں نے کی ہے۔یہ پروگرام یو ایس پاکستان انرجی ڈائیلاگ کے تحت امریکہ کی جانب سے پاکستان کے توانائی کے شعبہ میں خواتین کی تعلیمی اور معاشی شمولیت میں اضافہ کرنے کے عزم کی تکمیل کے تحت شروع کیا گیا ہے۔
اس پروگرام میں شریک ہونے والی پاکستانی طالبات ملک کی مختلف نجی اور سرکاری جامعات میں سائنس اور انجینئرنگ میں بیچلرز ڈگری کی تعلیم حاصل کررہی ہیں اور ان کو ایک سخت انتخابی طریقہ کار کے بعد منتخب کیا گیا ہے۔ اس موقع پر پاکستان میں امریکہ کے سفیر ڈونلڈ بلَوم نے کہا ہے کہ امریکہ اور پاکستان کے درمیان تعلقات کے قیام کی 75 ویں سالگرہ کے موقع پر ہمیں یو ایس پی ڈبلیو سی کے فیوچر آف ویمن اِن انرجی اسکالرز پروگرام کا آغاز کرتے ہوئے خوشی محسوس ہورہی ہے۔
پروگرام کے تحت پاکستان میں امریکی مشن توانائی کے شعبہ میں ملازمت کے مواقع کی متلاشی خواتین کی معاونت کر رہا ہے تاکہ انہیں ایک متحرک مستقبل کی خاطر پیشہ ورانہ روابط کے مواقع میسّر آ سکیں۔ یو ایس پی ڈبلیو سی کی ایگزیکٹو ڈائریکٹر رادھیکا پرابھو نے شرکاءکو مبارکباد پیش کرتے ہوئے کہا کہ یو ایس پی ڈبلیو سی کا فیوچر آف ویمن اِن انرجی اسکالرز پروگرام نوجوان خواتین کو توانائی کے شعبہ میں عملی تجربہ سے آراستہ کرے گا۔
Short Link: https://urdu.app.com.pk/urdu/?p=310408
