اسلام آباد۔14اگست (اے پی پی):یوم آزادی معرکۂ حق کے موقع پر شہداء کے اہلِخانہ نے اہل وطن کے نام اپنے پیغام میں کہا ہے کہ 14 اگست وہ دن ہے جب برصغیر کے مسلمانوں کا خواب پاکستان کی صورت میں حقیقت بنا،یومِ آزادی محض جشن نہیں بلکہ قربانیوں اور جدوجہد کی عظیم داستان ہے۔
لانس نائیک عامر عباس شہید کے بھائی نے یوم آزادی کے موقع پر اپنے پیغام میں کہا کہ 14 اگست وہ دن ہے جب بے مثال قربانیوں اور جدوجہد کے بعد پاکستان آزاد ہوا۔ انہوں نے کہا کہ 14 اگست ہماری آزادی کی یاد، قربانیوں اور ہمت کی داستان ہے،یہ دن ہمارے اسلاف کی قربانیوں اور سپاہیوں کی عظمت کو سلام پیش کرتا ہے۔بھائی لانس نائیک عامر عباس شہید نے مزید کہا کہ یہ دن ہمیں قربانیوں کی یاد اور سرحدوں کے نگہبان سپاہیوں کی عظمت کا پیغام دیتا ہے۔
انہوں نے کہا کہ افواج پاکستان ہر محاذ پر قوم کے دفاع کے لیے سینہ سپر ہے۔ اسی طرح نائیک ماجد شہید کے بیٹے نے یوم آزادی کے موقع پر کہا کہ کارگل کی بلندیوں سے سیاچن کے برف پوش میدانوں تک ہمارے جوان ہمیشہ سب سے آگے ہیں،جنگ سے لے کر قدرتی آفات تک عوام کی خدمت میں افواج پاکستان ہمیشہ پیش پیش ہیں۔ انہوں نے کہا کہ یوم آزادی پر اپنے ملک سے محبت اور محافظوں کے لیے دعا ہمارا فرض ہے۔
مزید برآں نائیک ماجد شہید کی بیٹی نے یوم آزادی کے موقع پر اپنے پیغام میں کہا کہ یوم آزادی پر ان محافظوں کو یاد رکھیں جو آزادی کے لیے جان نچھاور کرتے ہیں،یہ شہیدوں کی قربانیوں کا صلہ ہے کہ آج ہم آزاد فضا میں سانس لے رہے ہیں۔ انہوں نے کہا کہ ہمارا فرض ہے کہ ہم اپنے محافظوں کے لیے دعا کریں جو ہر لمحہ جان قربان کرنے کو تیار ہیں۔ بیٹی نائیک ماجد شہید نے اپنے پیغام کے آخر میں پاکستان زندہ باد، پاک فوج پائندہ باد کا نعرہ بھی لگایا۔
