پشاور۔ 24 اگست (اے پی پی):پروونشل ڈیزاسٹر مینجمنٹ اتھارٹی (پی ڈی ایم اے ) کی رپورٹ کے مطابق 15 اگست سے اب تک خیبر پختونخوا میں بارشوں اور فلیش فلڈ کے باعث مختلف حادثات میں اب تک 406 افراد جاں بحق اور 247 افراد زخمی ہوئے۔ اتوار کو پی ڈی ایم اے خیبر پختونخوا کی جانب سے 15 اگست سے اب تک ہونے والی بارشوں اور فلیش فلڈ کے باعث صوبہ کے مختلف اضلاع میں جانی و مالی نقصانات کی رپورٹ جاری کر دی گئی ہے۔ رپورٹ کے مطابق صوبہ میں ہونے والی بارشوں اور فلیش فلڈ کے باعث مختلف حادثات میں اب تک 406 افراد جاں بحق اور 247 افراد زخمی ہوئے۔ جاں بحق افراد میں 305 مرد، 55 خواتین اور 46 بچے جبکہ زخمیوں میں 179 مرد، 38 خواتین اور 30 بچے شامل ہیں۔
ضلع ڈی آئی خان میں رات ہونے والی بارش کے باعث گھروں کی چھتیں گرنے سے اب تک کی رپورٹ کے مطابق 8 افراد جابحق اور 48 زخمی ہوئے۔ رپورٹ کے مطابق بارشوں اور فلیش فلڈ کے باعث اب تک مجموعی طور پر 3526 گھروں کو نقصان پہنچا جس میں 2945 گھروں کو جزوی نقصان پہنچا جبکہ 577 گھر مکمل منہدم ہوئے، سیلاب سے زیادہ متاثرہ ضلع بونیر میں اب تک مجموعی طور پر جاں بحق افراد کی تعداد 337 اور صوابی میں 46 ہو گئی ہے۔ حادثات صوبہ کے مختلف اضلاع سوات، بونیر ، باجوڑ، مانسہرہ، شانگلہ ، دیر لویر، بٹگرام، ڈی آئی خان اور صوابی میں پیش آئے۔
پی ڈی ایم اے کے مطابق متاثرہ اضلاع کی انتظامیہ کو امدادی سرگرمیاں تیز کرنے اور متاثرین کو فوری معاونت فراہم کرنے کی ہدایت کی گئی ہے۔ پی ڈی ایم اے اور تمام متعلقہ ادارے آپس میں رابطے میں ہیں اور صورتحال پر نظر رکھے ہوئے ہیں۔ ترجمان پی ڈی ایم اے کے مطابق پی ڈی ایم اے کا ایمرجنسی آپریشن سنٹر مکمل طور پر فعال ہے، عوام کسی بھی نا خوشگوار واقعے کی اطلاع ، موسمی صورتحال سے آگاہی اور معلومات کےلیے فری ہیلپ لائن 1700 پر رابطہ کریں۔
