اسلام آباد۔18جولائی (اے پی پی):وفاقی وزیر داخلہ رانا ثنا اللہ خان نے کہا ہے کہ190 ملین پاؤنڈ واپس لینے کے لیے سپریم کورٹ سے رجوع کرنا ہو گا ، موجودہ حالات میں امید نہیں کہ ہماری اپیل منظور ہو گی، مردم شماری کو دوبارہ کرانے کے لئے سب کو متفق ہونا ہوگا،پی ڈی ایم تمام سیاسی جماعتیں اپنے اپنے پلیٹ فارم سے الیکشن لڑیں گی ، عام انتخابات میں کسی سیاسی جماعت سےانتخابی اتحاد نہیں کیا جائے گا ،پنجاب میں قومی اسمبلی کی 100 اور صوبائی اسمبلی کی 200سیٹیں پکی ہیں ۔ وہ منگل کو یہاں صحافیوں سے غیر رسمی گفتگو کر رہے تھے ۔
وفاقی وزیر داخلہ نے ایک سوال کے جواب میں کہا کہ چیئرمین پی ٹی آئی کو سزا یا نا اہلی ہو گی اس حوالے سے کچھ بھی کہنا قبل از وقت ہے ،سزا الیکشن سے پہلے ہو گی یا بعد میں ہو گی، معلوم نہیں ہے ۔ انہوں نے کہا کہ شیخ رشید ملکی سیاست میں اتنی اہمیت نہیں رکھتے کہ ان کو گرفتار کیا جائے ، انھیں اہمیت نہیں دینا چاہتے ۔
انہوں نے کہا 9 مئی میں ملوث شر پسندوں کے شواہد موجود ہیں اور ان کے خلاف کارروائی بھی جاری ہے، جو ان واقعات میں ملوث نہیں ہیں ان کے خلاف کسی قسم کی کارروائی نہیں ہورہی اور نہ ہی ہونی چاہیے ۔
ایک سوال کے جواب میں انہوں نے کہا کہ دہشتگردی کی کارروائیوں میں افغان سرزمین استعمال ہو رہی ہے ،افغان حکومت روکنا نہیں چاہتی یا صلاحیت نہیں رکھتی، یہ سوال اپنی جگہ موجود ہے ۔ ہم نے ا س حوالے سے ہر سطح پر بات کی ہے ۔ انہوں نے کہا کہ عمران ریاض کہاں پر ہے اللہ بہتر جانتا ہے ان کی فیملی نے ہمارے ساتھ رابطہ نہیں کیا رابطہ کریں گے تو مدد کے لیے تیار ہیں ۔
