اسلام آباد۔1مئی (اے پی پی):اتوار 2 مئی سے 4 مئی کے دوران آندھی،جھکڑ ، ژالہ باری، گرج چمک اور تیز وموسلادھار بارش کے باعث کمزور انفرا سٹرکچر (بجلی کے کھمبے، درخت، گاڑیوں، سولر پینل وغیرہ) کو نقصان پہنچنےکا اندیشہ ہے۔ محکمہ موسمیات کے مطابق آئندہ چوبیس گھنٹوں کے دوران اسلام آباد، کشمیر، خیبر پختونخوا،خطہ پوٹھوہار، شمال مشرقی/وسطی پنجاب، بالائی سندھ، شمال مشرقی بلوچستان اور گلگت بلتستان میں آندھی/جھکڑ اور گرج چمک کے ساتھ چند مقامات پر بارش کا امکان ہے۔
اس دوران بعض مقامات پر ژالہ باری،موسلادھار بارش جبکہ بالائی سندھ اور شمال مشرقی بلوچستان میں شام یا رات کے اوقات میں تیز ہوائوں ، آندھی، جھکڑ اور گرج چمک کے ساتھ چند مقامات پر بارش کا امکان ہے۔ رپورٹ کے مطابق گذشتہ 24 گھنٹوں کے دوران ملک کے بیشتر علاقوں میں موسم گرم اور خشک جبکہ وسطی/جنوبی علاقوں میں شدید گرم رہا تاہم خطہ پوٹھوہار، اسلام آباد، کشمیر اور بالائی خیبر پختونخوا میں بعص مقامات پر آندھی، جھکڑ اور گرج چمک کے ساتھ بارش ہوئی۔
سب سے زیادہ بارش مظفرآباد میں (ایئرپورٹ 26، سٹی 18)، گڑھی دوپٹہ 22، راولاکوٹ 12، مری 18، اسلام آباد 9، کاکول 13، میر خانی 5، پتن 2 اور بالاکوٹ میں ایک ملی میٹر بارش ریکارڈ کی گئی۔گذشتہ روز ریکارڈ کئے گئے زیادہ سےزیادہ درجہ حرارت کی رپورٹ کے مطابق شہید بینظیر آباد، موہنجوداڑو، سکرنڈ، سبی میں درجہ حرارت 48، دادو، جیکب آباد، خیرپور، پڈعیدن، مٹھی اور خانپور میں 47 ڈگری سینٹی گریڈ ریکارڈ کیا گیا۔
Short Link: https://urdu.app.com.pk/urdu/?p=590991
