لاہور۔25 جولائی (اے پی پی )وزیراعلیٰ پنجاب سردار عثمان بزدار نے کہا ہے کہ 25 جولائی 2018 کو پاکستان کے عوام نے تحریک انصاف کو تبدیلی کیلئے مینڈیٹ دیا اور عوام نے ووٹ کی طاقت سے نئے پاکستان کی بنیاد رکھی۔ 25 جولائی کو کرپشن کے بت پاش پاش ہوئے اور مافیاز کو شکست ہوئی۔ انہوں نے کہا کہ آج سے 2 برس قبل نئی امیدوں، نئی توقعات، نئی سوچ اور نئے نظریے کی جیت ہوئی۔ انہوں نے کہا کہ عام انتخابات میں شکست خوردہ عناصر نے وزیراعظم عمران خان کے خلاف پہلے دن سے ہی سازشیں کیں اور اللہ تعالیٰ کے فضل و کرم اور وزیراعظم عمران خان کی عوامی خدمت کی سیاست سے ہر سازش ناکام ہوئی۔عوام کل بھی تحریک انصاف کے ساتھ تھے، آج بھی ساتھ ہیں اور مستقبل میں بھی ساتھ رہیں گے۔ انہوں نے کہا کہ ہارنے والے عناصر جتنا مرضی پراپیگنڈا کرتے رہیں،وزیراعظم عمران خان کی قیادت میں نیا پاکستان آگے بڑھتا جائے گا۔ تنقید کی پرواہ کئے بغیر عوامی خدمت کے سفر پر آنچ نہیں آنے دیں گے۔ شکست خوردہ عناصر جان لیں کہ حکومت مدت پوری کرے گی۔ انہوں نے کہا کہ اپوزیشن جماعتیں بکھر چکی ہیں اور عوام میں ان کی ساکھ ختم ہو چکی ہے اور لوٹ مار کا دور قصہ پارینہ بن چکا ہے۔انہوں نے کہا کہ2 برس میں بے پناہ رکاوٹوں کے باوجود عوام کو بنیادی سہولتوں کی فراہمی کیلئے انقلابی اصلاحات کی ہیں۔ ہمارے کپتان کا عزم اور حوصلہ بلند ہے۔ وزیراعظم عمران خان نئے پاکستان کی تعمیر و ترقی کیلئے پرعزم ہیں۔ ہم عمران خان کے سپاہی ہیں اور ان کے ویژن کے مطابق نئے پاکستان کیلئے جدوجہد کر رہے ہیں اور تبدیلی کی راہ میں آنے والی ہر رکاوٹ کو دور کریں گے۔
