اسلام آباد۔27مئی (اے پی پی):صدر آزاد جموں و کشمیر بیرسٹر سلطان محمود چوہدری نے کہا ہے کہ 28 مئی 1998ء کے ایٹمی دھماکوں سے پاکستان اور بھارت کے درمیان طاقت کا توازن قائم ہوا، ایٹمی پروگرام سابق وزیر اعظم پاکستان شہید ذوالفقار علی بھٹو نے شروع کیا تھا جس کی بدولت آج ملک کا دفاع ناقابل تسخیر ہے۔
یوم تکبیر کے موقع پر اپنے خصوصی پیغا م میں انہوں نے کہا کہ پاکستان اور بھارت دونوں ایٹمی طاقتیں ہیں اور ان کے درمیان کوئی بھی حادثہ بڑی جنگ کا پیش خیمہ ثابت ہو سکتا جو کہ پوری دنیا کے امن کو اپنی لپیٹ میں لے سکتا ہے۔ انہوں نے کہا کہ جنوبی ایشیا میں امن کی کنجی مسئلہ کشمیر کے حل میں مضمر ہے، پاکستان اور بھارت کے درمیان اس سے قبل بھی مسئلہ کشمیر پر تین جنگیں ہو چکی ہیں جو کہ غیر روایتی تھیں لیکن اگر خدانخواستہ اب جنگ ہوتی ہے تو یہ ایٹمی جنگ ہو گی جو کہ نہ صرف پورے خطے بلکہ پوری دنیا کے امن کے لئے خطرہ ہے
لہذا بین الاقوامی برادری کو دیرینہ حل طلب مسئلہ کشمیر حل کرانے کے لئے اپنا کردار ادا کرنا ہو گا۔ ان کا کہنا تھا کہ عالمی برادری اقوام متحدہ کی قراردادوں کے مطابق کشمیری عوام کو ان کا حق خودارادیت دلوانے کے لئے اپنا کردار ادا کرے۔
