اسلام آباد۔21اپریل (اے پی پی):وفاقی وزیر مواصلات عبدالعلیم خان نے کہا ہے کہ سندھ میں 2 ارب ڈالر مالیت کی ایم-6 اور ایم-9 موٹرویز کے منصوبے اسی سال شروع کریں گے، صوبہ خیبر پختونخوا میں مانسہرہ، ناران اور کاغان موٹروے کے کام کا بھی امسال آغاز کرنا چاہتے ہیں، بلوچستان میں کوئٹہ سے کراچی این-25 کو بھی موٹروے کی طرز پر 4 لین بنانے کے کام کو شروع کیا جارہا ہے جبکہ سندھ میں سکھر، حیدر آباد اور کراچی موٹروے کا منصوبہ بھی شروع ہو رہا ہے۔
اس امر کا اظہار انہوں نے نیشنل ہائی وے اتھارٹی سینٹرل زون کے اجلاس کی صدارت کرتے ہوئے کیا۔وفاقی وزیر عبدالعلیم خان نے این ایچ اے حکام سے لاہور سے قصور کے 18 کلومیٹر لنک روڈ کے منصوبے کی تفصیلات طلب کرتے ہوئے کہا کہ اس ادارے کی”پریزینٹیشن "کو بامقصد اور معیاری ہونا چاہیے۔انہوں نے سینٹرل زون کے حکام کو کام کی رفتار تیز کرنے کی ہدایت کی تاکہ جاری منصوبوں کو کم سے کم وقت میں مکمل کیا جا سکے۔ عبدالعلیم خان نے کہا کہ ہم سب عوام کو جوابدہ ہیں، لوٹ مار نہیں کرنے دیں گے اور نیشنل ہائی وے اتھارٹی کو اپنی ذمہ داریاں پوری کرنا ہوں گی۔
اپنے ریمارکس میں وفاقی وزیر عبدالعلیم خان نے کہا کہ تعمیراتی کام کے معیار پر کوئی سمجھوتہ نہیں ہوگا، این ایچ اے شہروں میں داخلی راستوں کو خوبصورت اور دلکش بنائے جبکہ نئی شاہراہوں پر بھی صفائی ستھرائی اور خوبصورتی کے لئے طے شدہ معیار کو یقینی بنانا ہوگا۔ وفاقی وزیر عبدالعلیم خان نے ا ین ایچ اے ہیڈ کوارٹرز سینٹر ل زون کے دورے کے موقع پر پودا لگایا اور وفاقی سیکرٹری مواصلات اور چیئرمین این ایچ اے کے ہمراہ ہیڈ کوارٹر زکی کارکردگی پر بریفنگ لی۔
وفاقی وزیر عبدالعلیم خان کا کہنا تھا کہ افسران محنت اور جاں فشانی سے کام کریں، ان کو ان کا جائز حق ضرور دیا جائے گا اور ایمانداری سے کام کرنے والوں کی حوصلہ افزائی ہوگی۔ وفاقی وزیر مواصلات عبدالعلیم خان نے این ایچ اے حکام کو رنگ روڈ اتھارٹی سے حل طلب امور پر مشترکہ اجلاس کرنے کی بھی ہدایت کی تاکہ زیر التواء مسائل جلد سے جلد حل ہو سکیں۔
Short Link: https://urdu.app.com.pk/urdu/?p=585240
