اسلام آباد۔5دسمبر (اے پی پی):چیئرمین سینیٹ محمد صادق سنجرانی نے کہا ہے کہ پاکستان عراق کے ساتھ دیرینہ برادرانہ تعلقات کو بہت اہمیت دیتا ہے، ہمارے تعلقات اسلامی اخوت، ثقافت اور باہمی احترام پر مبنی ہیں ۔ ان خیالات کا اظہار انہوں نے پاکستان میں عراق کے سفیر حامد عباس لفتہ سے گفتگو کرتے ہوئے کیا جنہوں نے منگل کو یہاں پارلیمنٹ ہائوس میں ان سے ملاقات کی۔ سینیٹ سیکرٹریٹ کی جانب سے جاری بیان کے مطابق ملاقات میں دو طرفہ تعلقات اور باہمی دلچسپی کے امور سمیت فلسطین کی موجودہ صورتحال کے حوالے سے تبادلہ خیال کیا گیا۔
چیئرمین سینیٹ نے کہا کہ پاکستان اور عراق کے درمیان تعلقات مذہب، اخوت، اسلامی ثقافت اور باہمی احترام پر مبنی ہیں اورہماری قدریں مشترک ہیں، پاکستان عراق کے ساتھ دیرینہ برادرانہ تعلقات کو بہت اہمیت دیتا ہے۔ ملاقات میں دوطرفہ تجارت کو مزید فروغ دینے کے حوالے سے بھی تفصیلی تبادلہ خیال کیا گیا۔ چیئرمین سینیٹ نے کہا کہ عراقی قوم ایک بہادر قوم ہے جس نے ثابت قدمی سے اپنے مسائل پر قابو پایا ہے۔
اُن کا کہنا تھا کہ پاکستان اور عراق کے درمیان براہ راست فضائی روابط بڑھانے کی ضرورت ہے۔ ملاقات میں فلسطین کی موجودہ صورتحال پر تفصیلی تبادلہ خیال کیا گیا۔ چیئرمین سینیٹ نے کہا کہ عالمی طاقتیں اسرائیل پردباؤ ڈالیں کہ وہ معصوم فلسطینیوں کی نسل کشی بند کرے اور غزہ کا محاصرہ فوری ختم کر کے خوراک اور ادویات کی فراہمی آسان بنائی جائے۔
عراقی سفیر حامد عباس لفتہ نے کہا کہ ان کا ملک پاکستان کے ساتھ اپنے دوستانہ تعلقات کو قدر کی نگاہ سے دیکھتا ہے اور اقتصادی و تجارتی رابطوں کو مزید فروع دینے کی ضرورت ہے۔انہوں نے عراق میں کام کرنے والے پاکستانی تارکین وطن کی خدمات کو سراہا اور انہیں ہر ممکن سہولت کی فراہمی کی یقین دہانی کرائی۔ عراقی سفیر نے عالم اسلام کے اتحاد کےلئے پاکستان کی کاوشوں کو سراہا۔ ملاقات میں سیکرٹری سینیٹ محمد قاسم صمد خان بھی موجود تھے۔
Short Link: https://urdu.app.com.pk/urdu/?p=416836
