لاہور۔4مارچ (اے پی پی):ترجمان محکمہ زراعت پنجاب کے مطابق وزیر اعلی پنجاب کی جانب سے امسال5ایکڑ یا اس سے زائد رقبہ پر کپاس کی اگیتی کاشت کرنے والے کسانوں کیلئے25ہزار روپے مالی اعانت بذریعہ کسان کارڈ فراہم کی جائے گی۔اس ضمن میں کاشتکار کپاس کی اگیتی کاشت31مارچ تک مکمل کرلیں۔
کپاس کی اگیتی کاشت کے لیے فیصل آباد، سرگودھا، ساہیوال، ملتان اور ڈیرہ غازی خان ڈویژن کے اضلاع زیادہ موزوں ہیں۔ترجمان محکمہ زراعت پنجاب نے کہا کہ اگیتی کاشت کے لیے ٹرپل جین اقسام سی کے سی 01-، سی کے سی- 03اور حتف 3کاشت کریں۔
کپاس کی اگیتی کاشت کے لیے قطاروں کا باہمی فاصلہ 2.5فٹ اور پودوں کا باہمی فاصلہ 1.5تا 2فٹ رکھیں اور75فیصد سے زیادہ اگا ئووالا 4تا 5کلو گرام یا60فیصد اگائو والا 5تا 6کلوگرام براترا ہوا بیج استعمال کریں۔انہوں نے مزید کہا کہ اگیتی کاشت سے 50سے60من فی ایکڑ پیداوار حاصل ہوتی ہے لہذا کاشتکار کنیولہ،آلو، مٹر اور کماد کی برداشت کے بعد خالی ہونے والے رقبوں پر ترجیحاً کپاس کی اگیتی کاشت کرکے بھرپور منافع کمائیں۔
Short Link: https://urdu.app.com.pk/urdu/?p=568671
