اسلام آباد۔26فروری (اے پی پی):وفاقی وزیر برائے خزانہ و محصولات سینیٹر محمد اورنگزیب نے کہا ہے کہ حکومت پائیدار اور جامع معاشی ترقی کے لیے کوشاں ہے جو پوری قوم کی ترقی و خوشحالی کے لیے ناگزیر ہے۔بدھ کوسرحد چیمبر آف کامرس اینڈ انڈسٹری (ایس سی سی آئی) کے اجلاس سے وزیر مملکت برائے خزانہ و محصولات علی پرویز ملک کے ہمراہ بحیثیت مہمان خصوصی خطاب کرتے ہوئے سینیٹر محمد اورنگزیب نے کہا کہ وفاقی حکومت کی دانشمندانہ پالیسیوں اور معاشی اصلاحات کے نتیجے میں ملکی معیشت مستحکم ہوئی ہے جس کے مثبت اثرات عوام کی زندگیوں پر نمایاں ہونا شروع ہوگئے ہیں۔انہوں نے کہا کہ حکومت ٹیکس نیٹ کو وسعت دینے اور پاکستان کو برآمدات پر مبنی معیشت بنانے کے لیے جامع حکمت عملی کے تحت آگے بڑھ رہی ہے،
ٹیکس نظام کو آسان بنایا گیا ہے اور ٹیکس پالیسی آفس چند دنوں میں فعال کر دیا جائے گا تاکہ تاجروں، صنعتکاروں اور کاروباری برادری کو سہولت دی جا سکے۔وفاقی وزیر نے کہا کہ ایف بی آرمیں انفارمیشن ٹیکنالوجی اور ڈیجیٹلائزیشن متعارف کرائی گئی ہے تاکہ وقت کی بچت ہو اور مالیاتی امور میں مزید شفافیت یقینی بنائی جا سکے۔انہوں نے مزید کہا کہ موجودہ منتخب حکومت نے پاکستان کو درست سمت میں ڈال دیا ہے اور نجی شعبے پر بڑی ذمہ داری عائد ہوتی ہے کہ وہ آگے آئے اور ملکی ترقی میں موثر کردار ادا کرے۔
وزیر خزانہ نے کہا کہ نجی شعبے کو ملک خصوصاً معدنی وسائل سے مالا مال خیبرپختونخوا اور بلوچستان میں کاروبار اور صنعتکاری کے فروغ میں قائدانہ کردار ادا کرنا ہوگا ۔ حکومت صنعت و تجارت کے فروغ کے لیے ہر ممکن سہولت فراہم کرے گی تاکہ نوجوانوں کے لیے روزگار کے مواقع پیدا کیے جا سکیں اور غربت میں کمی لائی جا سکے۔انہوں نے کہا کہ حکومت کی دانشمندانہ معاشی اور مالیاتی پالیسیوں کے نتیجے میں مہنگائی کی شرح سنگل ڈیجٹ سے نیچے آ چکی ہے جبکہ گزشتہ ایک سال کے دوران چاول اور آئی ٹی کی برآمدات نے ریکارڈ اضافہ حاصل کیا جو جامع معاشی ترقی کے لیے حکومت کے عزم کا واضح ثبوت ہے۔
انہوں نے کہا کہ غذائی افراط زر، جاری کھاتوں کے خسارے اور روپے پر دبائو میں نمایاں کمی آئی ہے جس کے باعث معیشت کو استحکام ملا ہے۔ کاروباری اور صنعتی شعبے کو مراعات دی جا رہی ہیں تاکہ روزگار کے مواقع پیدا کیے جا سکیں جبکہ مقامی صنعتوں اور ایس ایم ایز کے فروغ پر بھی کام ہو رہا ہے۔انہوں نے مزید کہا کہ ٹیکس پالیسی آفس تاجروں اور ٹیکس دہندگان کو سہولت فراہم کرنے میں مدد دے گا اور ملک کو جامع ترقی کی راہ پر گامزن کرے گا۔وفاقی وزیر نے کہا کہ وہ ذاتی طور پر خیبرپختونخوا کے تاجروں کے مسائل کا جائزہ لینے اور ان کی مشکلات سننے کے لیے آئے ہیں۔
انہوں نے صدر سرحد چیمبر سے کہا کہ وہ آئندہ بجٹ کے لیے جامع اور قابل عمل تجاویز و سفارشات پیش کریں۔انہوں نے کہا کہ خوشحالی کا حصول صرف اس وقت ممکن ہے جب آمدنی اور اخراجات میں توازن پیدا کیا جائے۔ انہوں نے مزید کہا کہ وزارت خزانہ کی جانب سے کسی بھی معاملے میں کوئی تاخیر نہیں کی گئی، اب یہ بینک اور کلائنٹ کے درمیان معاملہ ہے کہ وہ اپنے مسائل حل کریں۔وزیر مملکت برائے خزانہ و محصولات علی پرویز ملک نے کہا کہ ہم سب پاکستانی ہیں اور یہ ہماری اجتماعی ذمہ داری ہے کہ ملک کی ترقی اور خوشحالی کے لیے کام کریں۔
انہوں نے کہا کہ حکومت آمدنی اور اخراجات میں توازن پیدا کرنے کے لیے کوشاں ہے اور اس کی معاشی اور مالیاتی پالیسیوں اور اصلاحات کے نتیجے میں بے پناہ چیلنجز کے باوجود معاشی استحکام حاصل کرنے میں مدد ملی ہے۔انہوں نے کہا کہ حکومت نے مالیاتی نظم و ضبط کو یقینی بنایا ہے اور ٹیکس ریفنڈ کے مسائل حل کیے ہیں۔ مزید برآں حکومت بجلی کے غریب صارفین کو ریلیف فراہم کرنے کے لیے بھی بھرپور کوشش کر رہی ہے۔
انہوں نے کہا کہ جب شہباز شریف حکومت نے اقتدار سنبھالا تو ملک سنگین معاشی بحران کا شکار تھا اور روزمرہ اشیاء کی قیمتیں بے قابو تھیں تاہم موجودہ حکومت نے معاشی بحالی کے چیلنج کو قبول کیا اور معیشت کو درست سمت میں ڈال دیا۔قبل ازیں سرحد چیمبر کے صدر اور دیگر ممبران نے وفاقی وزیر اور وزیر مملکت برائے خزانہ کا استقبال کیا اور کاروباری برادری کو درپیش مسائل اجاگر کیے۔ اس موقع پر مہمانان خصوصی کو روایتی پگڑیاں بھی پہنائی گئیں۔
Short Link: https://urdu.app.com.pk/urdu/?p=566784
