اسلام آباد ۔ 30 جنوری (اے پی پی) پاکستان تحریک انصاف کے زیراہتمام جنوبی افریقہ کے شہر سنچورین میں ڈیمز فنڈ ریزنگ کی مہم کے سلسلہ میں 4 فروری کو تقریب منعقد کی جائے گی جس میں سینیٹ کی قائمہ کمیٹی برائے اطلاعات و نشریات کے چیئرمین سینیٹر فیصل جاوید خان خصوصی طور پر شرکت کریں گے۔ سینیٹر فیصل جاوید نے اس موقع پر پاکستان کرکٹ ٹیم کو بھی شرکت کی دعوت دے رکھی ہے ۔ حالیہ دورے پر جنوبی افریقہ میں موجود پاکستان کرکٹ ٹیم کے کپتان شعیب ملک سمیت دیگر کھلاڑی بھی اس ایونٹ کی زینت بنیں گے۔ تحریک انصاف جنوبی افریقہ کے صدر زاہد افضل نے اس حوالے سے تیاریاں مکمل کر لی ہیں۔ ایونٹ میں وزیر اعظم عمران خان کا دستخط شدہ بیٹ اور گیند بھی نیلامی کے لئے پیش کیا جائے گا۔ سینیٹر فیصل جاوید نے اپنے پیغام میں کہا ہے کہ بیرون ملک پاکستانیوں کا جذبہ قابل تحسین ہے۔ اب تک ڈیم فنڈ میں پاکستانیوں نے بڑھ چڑھ کر حصہ ڈالا ہے۔ انہوںنے کہا کہ جنوبی افریقہ میں مقیم تارکین وطن سپریم کورٹ اور وزیر اعظم کی اپیل پر ڈیم فنڈ میں بڑھ چڑھ کر حصہ ڈالیں ۔ انہوں نے کہاکہ وہ وقت دور نہیں جب ہم پاکستان میں پانی کے بحران پر قابو پا لیں گے۔
