اسلام آباد ۔ 12 مارچ (اے پی پی) وفاقی وزیرصحت عامر محمود کیانی نے کہا ہے کہ اسلام آباد میں چار بڑے ہسپتال قائم کئے جائیں گے دس ارب روپے کی لاگت سے ایک نرسنگ یونیورسٹی بنائی جائے گی۔ ان خیالات کا اظہار انہوں نے منگل کو یونین کونسل کے چیئرمینوں کے اجلاس کی صدارت کرتے ہوئے کیا۔ انہوں نے کہا کہ اسلام آباد میں 2 رورل ہیلتھ سنٹرز اور 9 نئے بنیادی ہیلتھ یونٹس بنا رہے ہیں۔ اسلام آباد کو ہیلتھ کے حوالے سے ماڈل سٹی بنائیں گے۔ عامر محمود کیانی نے کہا کہ اسلام آباد میں لیڈی ہیلتھ ورکرز کی تعداد 300 سے بڑھا کر 600 کی جائے گی۔ صحت کے شعبے کی بہتری کے لیے انقلابی اقدامات کئے جا رہے ہیں۔ پولی کلینک کی نئی عمارت بنا رہے ہیں۔ انہوں نے کہا کہ ریجنل ہیلتھ سنٹرز اور بنیادی ہیلتھ یونٹس کو بھی اپ گریڈ کر رہے ہیں۔
